|
در راه شام یارب سن اوزون قیل منه یاری، گئجه یاری قورتار غم الیندن بو فکاری، گئجه یاری من بُرج محبّتدن آخان اولدوزام الله وحشتلی بیاباندا آدامسیز قیزام الله سندن صورا یوخ داد رسیم ، یالقوزام الله رحمت نظرون سال منه ساری گئجه یاری یوخ قافله موزدن اثر ، آهیم اوجالوبدی آرامیمی وحشت نئجه گور اَلدن آلوبدی هئچ بولمویورم عمّه لریم هاردا قالوبدی امدادیمه گلمور بیری باری گئجه یاری احوالیمه قان آغلوری گؤیلرده آی اولدوز داغلی اورگیمده اوجالور ناله ی جانسوز شه زاده علی اکبره بیر ناز ائلیَن قیز الآن دولانور تک بو دیاری گئجه یاری بو بی کسین احوالینی ای کاش بوله عمّه م یولدا گوزومی قویمویا ، داده گله عمّه م گوزلردن آخان یاشی ئوزومدن سیله عمّه م بیرده گوره بو پوزقون عذاری گئجه یاری آرزوم بودی هجران داشینی بیر دم آتِیدوم گوز یاشلی گئدوب قافله ی عشقه چاتیدوم بیر یولدا ربابون دیزینون اوسته یاتیدوم سینَمده سونه غصّه شراری گئجه یاری ذات حقه اولدی متوسّل او دل آگاه اَل باشدا گوزی یولدا ، یانان قلبیده مین آه دوشدی گوزی بیر قدّی کمان عورته ناگاه گوردی تانیا بولمور او زاری گئجه یاری گلدی دیله عرض ائتدی خانم ایلمه شیون بو غملی بیاباندا هایاندان گلوسن سن؟ نه علّته باشدان ایاقا قاره گیوبسن؟ آگاه ائله بو درده دچاری ، گئجه یاری کیمسن بو یامان یرده منیم دادیمه گلدون؟ یاندی اوره گون ناله و فریادیمه گلدون گؤردون که گلن یوخ منیم امدادیمه گلدون دیندیر منی باری سنی تاری گئجه یاری غم دفتریدور اوخشاماوین سطر به سطری ئولموش کیمین آیا ائدیسن ناله بو قدری؟ اوتلی نفسیندن گلوری عمّه مون عطری یاده سالور عطرون او نگاری گئجه یاری باخدیقجا منیم حالیمه دیلدن یانیسان سن دامانیوی اشک غمیله ایسلادیسان سن سسلورسن آدیملا! منی هاردان تانیسان سن؟ ای من تک اولان غصّه شکاری گئجه یاری سسلندی : قیزیم نار فراقه یانانام من درگاهی شرارِ ستمه اوتلانانام من سال قوللاریوی بوینوما زهرا آنانام من دینجل بیر آز ای خسته قناری گئجه یاری بیر قافله آهو سنه خاطر مَلَر ایندی قیزلار یریوی بوش گؤروب اشکین اَلَر ایندی صبر ایله داریخما خانم عمّه ن، گلر ایندی ائتمه بو قَدَر گوز یاشی جاری گئجه یاری سن شامی قیزیم روضه ی رضوان ائده جاقسان درمانده لرین دردینه درمان ائده جاقسان بیر سُفره ده، مین حاتمی مهمان ائده جاقسان روشن ائده جاقسان شب تاری گئجه یاری ****** کریم نصیری دولت آباد مرندی برچسبها: کریم نصیری مرندی
+ نوشته شده در یکشنبه ۲۶ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
