|
اربعین هر قلبه آرتورور ضربان اربعین گونی عاشقلره گلور هیجان اربعین گونی بو اتحاد عالی نمودار عشقدور گوز یاشیمیز مظاهر اسرار عشقدور شوریده سر بیزی ایلین ، آری عشقدور عشق اولماسا ندور بو فغان اربعین گونی بو گونده وار نه صبح خوش آینده ای خدا هر مؤمنی که فجر نمازین ایدور ادا یوز قبله ده دوشور باشنا شور کربلا ایلور ظهور عشق نهان اربعین گونی افسوس عقده مز گینه دیلده آچلمادی بند اولدی آرزو سوزی دیلده آچلمادی یول باغلى قالدی حیف بو ایلده آچلمادی مأیوس اوتوردی پیر و جوان اربعین گونی بو مجلس غمی ئوزوه ایله بزم راز توک اشکوی جمالوه قیل کسب امتیاز رخساروه ئورک سوزوی کپریگونله یاز باد صبادی نامه رسان اربعین گونی صدقیله بو سوزی یازون ای شاه کربلا لبریز اولوب داخی قدح صبريميز آقا محرابلرده تربتون آز قالدی قورتارا حسرت اودی ایدور فوران اربعین گونی ای کاش وصلته يته نفس حمیده میز نهر حسینیه قارشا آب دیده میز پرواسی یوخدی اولسا اگر پاک عقیده میز ایلر کمک امام زمان اربعین گونی يوخ معرفت که جابر انصار اولاق سنه لطف ایله درگهونده عزادار اولاق سنه کچدی بو ایل گلن ایلی زوّار اولاق سنه گوز یاشی گوزده سینه زنان اربعین گونی هر اربعینده شیعه لرون جوش ایدر قانی کرب و بلاده زایروون اولمیور سانی زینب کیمی ولی سنه زوّار اولان هانی قبرون گورنده سسلدی جان اربعین گونی دولدوردی اشک شوقیله زینب ایکی گوزون آماده ی طواف ایلدی عشقیله ئوزون کشف ایتدی حاجیان بلا کشلره سوزون اطرافین آلدی پیر و جوان اربعین گونی قیزلار دالندا صول طرفنده خانم رباب کلثوم ساق طرفده ئورکلرده اضطراب سوزان دیلیله زین العباده ایدوب خطاب سنده اوغول قاباقدا دایان اربعین گونی کوی نگاره سعی ایله گام خجسته آچ باب زیارتی بو زیارت پرسته آچ عباسیمون یاتان علمین باشیم اوسته آچ قارداشیم اولماسون نگران اربعین گونی گللم دالونجا گتدوقجه من یوبانمارام ضعف ایلسم یوز اوسته سورونّم دایانمارام دوتسام سنی یوزومه حسیندن اوتانمارام یوخدور باجون فصیحه زبان اربعین گونی سجّادی پیش رو ایدوب اول بانوی حیا یول باشلادی مزاره طرف آل مصطفی یدّیی قدم قالاندا اوزی دوشدی توپراقا قبره سوروندی اشک فشان اربعین گونی نیمه نفس یتوردی او قبر اوستونه اؤزون گه ساق یوزونی قویدی گهی قویدی صول یوزون چکدی گوزونه تربتینى باشلادی سوزون درد دلین ایدوبدی بیان اربعین گونی قارداش باجون فدا بو مزار مجلّله احوالیمی سوروشسون اگر زنده دور هله شامونده فتح نامه سنی سالشام اله فاتح گلوبدی حق دانشان اربعین گونی میقات عشقوون عجب آرتوبدی عزّتی مهد فضیلت ایلموسن سن بو تربتی هر کیمسه جستجو ایلسه باب جنّتی اولسون گرک بو قبره روان اربعین گونی خاک شفای محضدی بو خاک عالیه بو تپراقون یانندا نه عنبر نه غالیه سرمایه دور مزاریده هر دست خالیه بولسون عیارین اهل جهان اربعین گونی لطف ایلدی حرم لریوه حیّ دادگر فیض زیارتونله بیزی قیلدی مفتخر قلبونده که یارادان حسین ویر منه خبر راحتدی یا آخور گینه قان اربعین گونی بو اربعین مزاروون اوستونده من وارام امّا گلن ایله بُولورم زنده قالمارام قدّیم خمیده ساچلاریم آق ، دلده وار یارام بیرده گلم سن ائتمه گمان اربعین گونی دشمن نقدری اولدی عداوتده پر توان بیر ذرّه من کیچیلمدوم ای شاه انس و جان سرباز فاتحه ویرولور رسمدور نشان ایله منه عطای نشان اربعین گونی چوخ ناگراندى اصغر مه پاره دن رباب دست قضا هایاندا اونا آچدی رختخواب منله دانشموساندا اونا باری وئر جواب قلبینده یوخدی ذرّه توان اربعین گونی ****** مرحوم انور اردبیلی
برچسبها: انور اردبیلی
+ نوشته شده در یکشنبه ۲۶ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
