‍ ورود کربلا - زبانحال امام حسین(ع) خطاب به خواهرش زینب (س)

وادی درد و غصّه دور کرب و بلا آنام باجی

صبر ایله وار باشوندا چوخ درد و بلا آنام باجی

روز ازلده ویرمیشم دل هامی ابتلایه من

عالم عشقده دوزم هر غم و هر بلایه من

گلمیشم اول مرامیله ایندی بو کربلایه من

واردی رضایتیم یته هر نه قضا آنام باجی

گورماقا هر بلا و غم من بو مکانه گلمیشم

عشق خدنگینه ایدوب سینه نشانه گلمیشم

اوز قانیما بویانماقا داوطلبانه گلمیشم

آئینه ی دلیم تاپار بوردا جلا آنام باجی

ای باجی باشدان آتمیشام فکرت باش و جانیمی

فاش ایدرم عوالم مُستَتَر و عیانیمی

سو یرینه گرک ویرم گلشن دینه قانیمی

تا تاپا گلسِتان دین عمده صفا آنام باجی

بیله اولوبدی عهدیمیز حضرت کبریائیله

قانه باتام بو وادی عشقده من وفائیله

کوی وفایه گلمیشم یتمیش ایکی فدائیله

کرب و بلانی ایلیم رشگ منا آنام باجی

ویردی خلیل حق اگر کوه مناده بیر فدا

ایلدی فخر هر یئره بیر او فدائیله منا

لیک او منایه فخر ایدر دهرده دشت کربلا

یتمیش ایکی تن ایلرم بوردا فدا آنام باجی

ویرّم ازلده من فدا اوغلوم علی اکبری

ظلمیله قوم اشقیا دوغرار او ماه پیکری

هجری جنون عشق ایدر لیلی زار و مضطری

ذکری اولار بیر عمر اونون وا ولدا آنام باجی

بسکه بو عرصه ده اَسَر باد محبّت و وفا

رنگ به رنگ گول آچار باجی بو گلشن بلا

قاسم گول بدن ویرر بو یئره اوزگه بیر صفا

اللرینه یاخان زمان قانلا حنا آنام باجی

راه فراتی ظلمیله باغلار او گون که اشقیا

سوز عطشله اودلانار جمله بنات مصطفا

باغ بتولده داخی قویماز عطش قالا صفا

اوج ایدر عرشه ناله ی وا عطشا آنام باجی

نایره ی عطش سالار اود دل آل هاشمه

تشنه اوشاقلاریم اولار یأسیله جمع باشینه

حالیمی هر گورن یانار سوز نهان و فاشیمه

گوسترر اوندا قارداشیم رسم وفا آنام باجی

راه وفانی سیر ایدر همتّیله قدم قدم

تشنه آلار شریعه نی تشنه چیخار او م حتشم

مشگینی اوخلار اشقیا قوللارینی ایدر قلم

اوندا حسینیوون اولار قدّى دوتا آنام باجی

بوردا غم و مصیبتیم حدّ و نصاب دن گیچر

اصغر شیرخواره نین حلقینی ظلم اوخی بیچر

سو یرینه سوسوز بالام ظلمیله قانینی ایچر

ثابت ایدر نه ظلم ایدوب اهل جفا آنام باجی

عالم عشقده گرک شوقیله امتحان ویرم

سینه مه اوخلاری دوزوب دسته به دسته سان ویرم

نهر فراتده گوزوم تشنه یارالی جان ویرم

دیلده کی مقصدیم منیم حاصل اولا آنام باجی

فکر و خیال عالمی باشدان اوزوم آتام گرک

گوزدن آخان سرشگیمی اوز قانیما قاتام گرک

گون قاباقیندا ظلمیله قانه باتوب یاتام گرک

ال یارا پیکریم یارا سینه یارا آنام باجی

باجی بو خدمتیمده وار منله سنون شراکتون

یعنی منیم کیمی اولار عالم دینه خدمتون

گون کیمی آشکار ایدر حقّی سنون اسارتون

دینه حمایت ایلروخ اُخت و اخا آنام باجی

(( تائب )) اوزینه حقّدن لطف و عنایت ایستوری

آرتوق اولا او یازدیقی سوزده حلاوت ایستوری

چوخدی گناهی آغلوری بیرده شفاعت ایستوری

بیزده شفاعت ایلروخ روز جزا آنام باجی

******

مرحوم حاج صادق تائب تبریزی


برچسب‌ها: صادق تائب تبریزی
+ نوشته شده در  دوشنبه ۲۷ اسفند ۱۴۰۳ساعت   توسط حاج محمد محمد قاسمی  |