نوحه حضرت علی اکبر(ع)

اکبر بویاندی قانه گل داده یا ابوالفضل

قالدیم بو گون کمک سیز دنیاده یا ابوالفضل

قالدی الیم اورکده موج غمه بویاندیم

گلدیم یارالی باشی اوسته ازل دایاندیم

باخدیم بو باش یاراسین گوردوم بو غمده یاندیم

شدت تاپوب فغانیم دنیاده یا ابوالفضل

مشگلده قالمیشام من بو درده یوخدی چاره

اکبر باشینون اوسته من گلدیم آه و زاره

اولدی اورک باشی بو تیر محنله یاره

کشتی کیمی قالیب دی دریاده یا ابوالفضل

گل گورگیلن حسینین دای قطع اولوب چاراسی

چون واردی اکبریمین باشدا بویوک یاراسی

بیر چاره ایت علینون مشگل گشا بالاسی

قان آغلیار اورکده زهراده یا ابوالفضل

دشمن ستم ایدوبدی آرامیمی آلوبدی

چون نوجوان بالامی آتدان قوشون سالوبدی

دشمن ایچینده اوغلوم یالقوز بو گون قالوبدی

فرصت یتوبدی قوم بی داده یا ابوالفضل

از بس که یاره دگمیش میداندا پیکرینه

باش قانی آخدوقیجان پُر اولدی گوزلرینه

تا لبلریمی قویدوم بو قانلی لبلرینه

وار دور اثر او قاندان مولاده یا ابوالفضل

اوپدوم ئوزیندن ایندی لبلر قانا باتوبدی

خواب عمیقه گیتمیش زخمی بالام یاتوبدی

گویا که باشدان اکبر جان فکرینی آتوبدی

قان قطره قطره واردی سیماده یا ابوالفضل

هر چند سسلورم من یاتما علی آماندی

هجرونده ناز دانم نالم گویه دایاندی

دنیاده بیل عزیزیم داغ جوان یاماندی

قویما منی عزاده هیجاده یا ابوالفضل

لیکن سسیمه بیر سس ویرمور علیّ اکبر

مثل اینکه خاموش ایتمش عُمرِ شمعینی لشگر

قلبیمه داغ چکوبدی بوگون گروه کافر

غملر اثر قویوب ره پیماده یا ابوالفضل

من اوخشارام بالامی بو چولده یانه یانه

محنت یلیله قارداش غم یتدی گلستانه

موج غم ئوز ویروبدی گُلشنده باغبانه

باغ جناندا آغلار لیلاده یا ابوالفضل

امر حسینه فوراً سقّا هرایه گلدی

گوردی یارالی نعشی آه و نوایه گلدی

نعش علی قویولدی بین عبایه گلدی

طاهاده آغلیوبدور معناده یا ابوالفضل

یازما قلم دایان دور قورتار بو غم کلامین

عباسه ((مهدوی )) نون ایندی یتور سلامین

مهدی آلار علینون دشمندن انتقامین

صبر ایت فغانه گلمه دنیاده یا ابوالفضل

******


برچسب‌ها: رضا مهدوی
+ نوشته شده در  چهارشنبه ۱۵ اسفند ۱۴۰۳ساعت   توسط حاج محمد محمد قاسمی  |