احوالات کوچ اسرا از قتلگاه– زبانحال حضرت زینب (س)

ای پرپر اولان گُل کیمی گُل پیکری قارداش

دور سال یولا بو قاره لچک لشکری قارداش

هجران داغی آز قالدی چکیلسین جگر اوسته

دشمن بیزی شامه آپارور ناقه لر اوسته

زینب سسووه قربان اذان ویر سفر اوسته

بیدار ایله بو قوم ستم پروری قارداش

نا مرده گرفتاریدی ذُریّة زهرا

سجادیمی عریان دَویه میندیروب اعدا

نا خوشدی یانور تبده اَسور پیکری امّا

افسوس اولا یوخدور بالامون بستری قارداش

ایکاش کی بو منظره نی یار گوریدی

هر کیمده کی وار غیرت سرشار گوریدی

ایکاش ابوالفضل علمدار گوریدی

کیملر قولی باغلی آپارور کیملری قارداش

قانون بوغازوندان توکولوب کرب و بلایه

قرآنی مُسَجّل ایلدی آیه به آیه

سر نیزه دن اعلان ایلدون اهل ولایه

سر نیزه دی آزاده لرین منبری قارداش

سن سعی ایلدون سنگر حق محتشم اولسون

قویدون باجووی ئوز یریوه رفعِ غم اولسون

خونِ شهدا ، روحِ حجابه قسم اولسون

ئوللم ولی ترک ایلرم سنگری قارداش

گر چه من ئوزوم وصلووه ای ماه خمارم

اما گیجه دن بیر غم دشواره دچارم

سن بیل ننه مون جانی ئوزون دی نَدی چارم

مندن سنی ایستور ننه مون بنذری قارداش

مردودیدی رحم اولماسا هر رسم و رویّه

اما بیزه اجحاف ایلدی آل امیّه

ایکاش یازا قبریمون اوستونده رقیّه

بختی قره نون قاره اولار معجری قارداش

قویدوم گیدورم جسمیوی چوللرده کفن سیز

گیتمزدی باجون آند اولا ئوز جانیوه سن سیز

قورخوم بودی دشمن گوره قیزلاریوی من سیز

قول باغلی سوسوز گزدیره لر چوللری قارداش

بیچاره ربابون غمی مین زهریلی اوخدی

هر بیر اوخی دگسه آنانون قلبینه چوخدی

گوردی بیزی شامه آپاروللار یولی یوخدی

آهولره تاپشوردی علی اصغری قارداش

وار قاعده ائللرده بو بیر امر یقیندی

دامادی ئولن نامزدین دردی چتیندی

دور خیر و دعا ویر بالاما تازه گلیندی

سر نیزه نون اوسته دولانور دلبری قارداش

(( غفاری )) غلاموندی قاپوندا نظر ایله

شخصیّتی مفرغ ده اگر اولسا زر ایله

چک سایووین آلتیندا آدین معتبر ایله

اولسون سنه لایق قاپووین نوکری قارداش

******


برچسب‌ها: حسین غفاری اردبیلی
+ نوشته شده در  پنجشنبه ۱۶ اسفند ۱۴۰۳ساعت   توسط حاج محمد محمد قاسمی  |