بزم عزا راجع به قمربنی هاشم (ع)

بزم عزاده گیمیشم – قاره یا عباس

بیچاریم قیل دردیمه – چاره یا عباس

یا باب الحوائج

ای پرچم حریتی - ساخلیان سردار

وی کاروان وحدته - قافله سالار

مشکلده قالسام ایلرم – آدیوی تکرار

قربان اولوم سن تک فدا- کاره یا عباس

یا باب الحوائج

ای حق مناسینده گیین – قانلی احرامی

گزدون یارالی باشیله – کوفه و شامی

حفظ ایتدی ایثارون سنون– دین اسلامی

اولدی نشان عمرون گلی- خاره یا عباس

یا باب الحوائج

کوی محبتده هانی - سن کیمی جانباز

عشق عالمینده آلموسان – رتبه ممتاز

هاردا آدون سسلنمیشم- گورموشم اعجاز

ائتمه ارادت قیدیمی – پاره یا عباس

یا باب الحوائج

آند اولسون آننوندا اولان – زخم پیکانه

بیر تار مویون وئرمرم - تخت شاهانه

قانلی گوزون یاد ایلیوب - گلم افغانه

دگدی سنه اغیاریدن - یاره یا عباس

یا باب الحوائج

آتدان دوشنده سسلدون – عالمین یارین

گلدی غریب کربلا – تاپدی سردارین

قانلی جبینونده ئوپوب – سجده آثاری

باتدی یوزی ثار اللهین – ثاره یا عباس

یا باب الحوائج

سسلندی ای آرخام ائلیم آچ گوزون قارداش

تاراج اولوب تاب دلیم آچ گوزون قارداش

قارداش جانی سیندی بلیم آچ گوزون قارداش

چاره م آزالدی گلمیشم – زاره یا عباس

یا باب الحوائج

ای یاور قرآن مرحبا – بخت مسعوده

چاتدون شهادت فیضینه– اولدون آسوده

اوچدون هما تک ساحت- قدس مقصوده

گئتدون یارالی محضر – یاره یا عباس

یا باب الحوائج

ادرک پیامون خیمه ده- ایندی آلدیم من

گوردی باجیم نه غصه لی حاله قالدیم من

قربان بو قولسوز قامته دور قوجالدیم من

اولدی جفا سن تک وفا – داره یا عباس

یا باب الحوائج

سنسیز حرمده عترت– بو تراب آغلار

اولموش عطشدن قیزلاریم دلکباب آغلار

گه اصغره لایلای دییر – گه رباب آغلار

عالم فدا بو چشم خون – باره یا عباس

یا باب الحوائج

عباس آقا دلدن نقدر- الامان گلسون

ایستور ((کلامی)) قبریوه- نوحه خوان گلسون

آچ باغلانان یوللاریوی– کاروان گلسون

ایسته بو جمعی توزلی در – باره یا عباس

یا باب الحوائج


برچسب‌ها: ولی اله کلامی
+ نوشته شده در  پنجشنبه ۱۶ اسفند ۱۴۰۳ساعت   توسط حاج محمد محمد قاسمی  |