|
زبانحال خانم لیلا به حضرت علی اکبر(ع) اخترِ تابانیم اکبر عزّتِ دورانیم اکبر عزم میدان ائتمه اوغلوم گتمه اوغلوم، گتمه اوغلوم لیلینی هجران ایدر درده مبتلا آهو باخیش گوزلروه گوزلریم فدا بیامانم باغریقانم گتمگوندن ناگرانم (مخالف) دویمادیم من خوش سوزوندن آتما منی تز گوزوندن هر نه دن سن منه باصفاسن قلبیمون دردینه آشناسن ____________ حسنووه مفتونم اوغلوم عشقیوه مجنونم اوغلوم وار یوزونده قاره خالون آیدان آیدین دور جمالون لاله کیمی گول یوزوون داغداریم بیر ئوپوشه لبلروون بیقراریم (مخالف) قاشلارون محکم کماندور کیپریگون اوخدان یاماندور اوخلاما قلبیمی قاش گوز آتما دمبدم آیریلیقدان سوز آتما ____________ دردوه دوزدوم دایاندیم آتشِ عشقونده یاندیم چوخ تَلَسمَه کار و زاره گِتسون اولّام بختی قاره عمریمی محنت ویرر باده سنسیز خوش گونوم اولماز بو دنیاده سنسیز (مخالف) مَرکبِ عشقون دایاندیر عزمِ هجرانون یوباندیر قویما قلبیم فراقونده یانسون گل اوتور لیلی باشه دولانسون ____________ بیکس و بیداد خواهم چارهسیزم بیپناهم حالیمه بیگانه یانماز لیلی سن سیز زنده قالماز گِتسون علی آتشِ هجرونده یانّام باش گوتوروب چوللره ویلان دولانّام (مخالف) سروِ زیبا قامت اوغلوم وار دیلیمده حسرت اوغلوم گتمه ای دردیمین آشناسی گیمیوبسن هله طوی لباسی ____________ مشعلِ حسنون آلیشدیر لیلینی دیندیر دانیشدیر گور نه شیرین صحبتیم وار دیلده داغِ حسرتیم وار برهم ایدوب عمرومون ظلم اساسین اللریوه یاخمادیم طوی حناسین (مخالف) کاخِ آمالیم تالاندی سیر اقبالیم دولاندی خونِ دیللر یدیم گول بجردیم جان قویوب عشقووه غصّه دردیم ____________ گور نه یانیب گوینَرَم من سنسیز علی نیلرم من آتماز اوغوللار آناسین گوزلرون آللام قاداسین گل آنوون غصّهلی گوگلون آل گیت باشینه لیلانون علی قاره سال گیت (مخالف) دوزمه قلبیم چوخ دویونسون ناز ایله لیلا سویونسون روحیمی هجرون ایلر مکدّر عمّووه لیلینی تاپشور اکبر بیامانم باغریقانم گتمگوندن ناگرانم (سید تقی سیفی اردبیلی) برچسبها: سید تقی سیفی اردبیلی
+ نوشته شده در پنجشنبه ۱۶ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
