|
زبانحال حضرت زینب (س)به امام حسین (ع) در اربعین شاماتیده سالدیم باشا سودای زیارت بیر قافله گَتدیم هامی ارباب محبّت دور قافله ی عشقیدی اعزاز ایله قارداش هیهات بو زوّار اولا پیشواز ایله قارداش قبرون نچه مدّتدی باشیمدِیدی هواسی هر شام و سحر نی کیمی دلدِیدی نواسی بوردِیدی بُلوردوم هامونین درده دواسی بو قانه دونن گوگلومه لطف ایله صفا ویر بیماریوم آخِر منه دور خاک شِفا ویر یالقوز نه فقط زینب مظلومه دی بیمار بیماریدی هر قدر منه همره اولان وار بیر قافله بیماریوه بیمار پرستار بیمار سنون ، درد سنون، چاره سنوندور بو جمع پریشان دل و آواره سنوندور ای قبری سالان حیرته هر قلب سلیمی محو ایلین انوارینه مینلرله کلیمی اعلام ایلین قدرت خلّاق علیمی بو نور اوجالان قبر مگر طوریدی قارداش نه تک منه، عالم لره منظوریدی قارداش ای مرقد شش گوشه سی عالمده یگانه عطری یارادان حسرت دل عطر جنانه غبطه آپارور عرش خدا قبریوه یا نه عرشین هانی شانینده بیله رفعت اولِیدی سن کشتة عشقه دولانوب تربت اولِیدی عشق اوسته یاراتموش سنی خلّاق محبّت تک عشقیدی یالقوز سنه آب و گِل خلقت سنسن گر اولا جوهره ی عشق و حقیقت ای عشق و محبّت سر کویوندا مُلازم سن اولمیه سن عشق و محبّت نَیه لازم چوخلار قویوب عالمده قدم جادة عشقه چوخلار اوزادوب همّت اَلین بادة عشقه تا رنجه قدم ایلدون آباده ی عشقه عشق اوسته گیدن قافله دن جاده بوشالدی قانلی لبِ لعلوندن اوپَن باده بوشالدی هر ساغر غملر دولوسیدی باشا چکدون عالمده اولان سر خطه خط بیرباشا چکدون تا کعبه ی آمالیمیزی داغ داشا چکدون بو کعبه ده اولاد خلیلون گوزی واردی بیرآیدی که مین کعبه کیمی اولدوزی واردی بو کعبه ی آمالیده ای غایت آمال آمال بر آورده دی مقبولیدی اعمال ایّام طوافی شب و روز و مه و هر سال مدفونی نه لازم دیوله ذات خدادی بسدور که زیاراتی زیارات خدادی بیر رونقی وار روضه وین ای روضة رضوان ای رونق بازاری جنان حوری و غلمان مشتاقیدی بو روضیه خازن اولا رضوان روضنده سنو ن ای گُل گُلزار بهشتی بی رونق اولار صحبت بازار بهشتی دل مرده لری زنده ایدر نکهت قبرون بیر تازه روان جانه ویرور نزهت قبرون مین چشمه ی حیوانه دگر تربت قبرون باشدان اَیاقا خونِ م قطّردی بو تربت پیغمبرین عطریله معطّردی بو تربت (ذهنی زاده متخلص به سائل) برچسبها: عبدالعظیم ذهنی زاده
+ نوشته شده در جمعه ۱۷ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
