وفات ام البنین

ای دوشن قوللاری قولسوز ئولن اوغلوم ئولورم

ساق گوزون زهرلی پیکان اوپن اوغلوم ئولورم

آز قالور حمل ایده لر خاک بقیعه ننووم

گل چاتوب سانلی گونوم باشه من اوغلوم ئولورم

نچه آیدور آیا بنذر یوزووی گورممشم

گل گورونسون منه وجه الحسن اوغلوم ئولورم

ننه ایستر گوره جان اوسته اورک پاره سینی

عمرینون شمعی ستمله سونن اوغلوم ئولورم

سنی گورسم ئوپرم اوّل اوزون قوللاریوی

قوللاری تپراقا تندن دوشن اوغلوم ئولورم

کاش کاش دورت بالام ئولمیدی منیم غربتده

حیف اولا ایندی همان غصّه دن اوغلوم ئولورم

دورت اوغول چیگنینون اوستونده گیدردیم قبره

چاتمادیم عهدیمه شیرین سخن اوغلوم ئولورم

اوغلون عبدالله اولوب قدّن اوجا قولدان اوزون

دیورم آی بالاما بنذّین اوغلوم ئولورم

ویر ابوالفضل علمین باغریما جان اوسته چکیم

سسلنوم آی منه سرو چمن اوغلوم ئولورم

دوتمیوبسان سنه قربان نچه ئیله آدیمی

منه چون محبس اولوبدور وطن اوغلوم ئولورم

گل اوخی یاسینی ای عترت یاسین کمکی

زندگیده منی چوخ ایستین اوغلوم ئولورم

ایتدیم اعلان منه بیرده دیمیون امّ البنین

علّتین قلبیدن ایتدیم علن اوغلوم ئولورم

دیدیم اوغلانلاریم اللرده ئولوب قاره گونم

یاندی بو صحبتیمه مرد و زن اوغلوم ئولورم

عزّتیم گیتدی حسینییملن آدامسیز ننیم

گوز یولوزدا اورگیمده محن اوغلوم ئولورم

قبریوی گورممیشم دیلر اوغول خیردا جادی

آغلیوب حالیمه بیت الحزن اوغلوم ئولورم

نیه کوچکدی مزارون اوجا قامتلیدون

قامتین زهریلی خنجر بیچن اوغلوم ئولورم

یوزون آغ فاطمه قیزلارینه خدمت ایلدون

جامة مهر و محبّت گیین اوغلوم ئولورم

اولمادیم کرب و بلاده باشیمی منده آچام

ننه سیز قانلی مناده ئولن اوغلوم ئولورم

روز و شب آغلامیشام یاندریجی بیر غمووه

جنگیده آلننا پیکان دگن اوغلوم ئولورم

نجه چکدون اوخی قوللار بدنونده یوخوموش

گل حسین چک بو اوخی سسلنن اوغلوم ئولورم

بیله دیر کی سنون مشگوه پیکان دگوب

سویون اوستونده خجالت چکن اوغلوم ئولورم

******

یوسف معزّی اردبیلی


برچسب‌ها: یوسف معزی اردبیلی
+ نوشته شده در  جمعه ۱۷ اسفند ۱۴۰۳ساعت   توسط حاج محمد محمد قاسمی  |