اظهار ارادت به پیشگاه علمدار کربلا

دردیمه قیل دوا یا ابوالفضل

ویر مریضم شفا یا ابوالفضل

گلمیشم باب احسانه مولا

یاز منه کربلا یا ابوالفضل

سن آقا من گدا یا ابوالفضل

ای حسینین علمداری مولا

غم گونی یار و غمخواری مولا

محرم راز اسراری مولا

جان خیر الورا یا ابوالفضل

وارث مرتضا یا ابوالفضل

سن کی کان سخا سن طبیبا

بسکه مشگل گشا سن طبیبا

دردیمه آشنا سن طبیبا

حاجتیم ایت روا یا ابوالفضل

زیب متن دعا یا ابوالفضل

آدوی هر بیر آزاده سسلر

قالسا مشگلده کیم داده سسلر

یاد و بیگانه امداده سسلر

ایله رفع و بلا یا ابوالفضل

قویما آغلار قالا یا ابوالفضل

دینه خاطر گیچوب سن باشوندان

قوللاروندان گوزوندن قاشوندان

گیچمدون بس حسین قارداشوندان

جانیوه جان فدا یا ابوالفضل

عشقیوه مرحبا یا ابوالفضل

افتخاریله گیچدون ئوزندن

گیچمدون تأیید اولموش سوزوندن

گلدی اوخ ئوپدی شهلا گوزوندن

پوزدی حالون قضا یا ابوالفضل

غملیدور ماجرا یا ابوالفضل

دگدی اوخ مشکوه آخدی اشکون

جاری اولدی جماله سرشگون

خالی قالدی سودان اوخلی مشکون

گیتدی الدن قوا یا ابوالفضل

ای غمه مبتلا یا ابوالفضل

خیمیه گیتماقا یول کسیلدی

ضربه گوردی باشون قول کسیلدی

ساق دوشوب توپراقا صول کسیلدی

تندن اولدی جدا یا ابوالفضل

اولدی جاری دما یا ابوالفضل

ایستدون داده مولانی گلسون

وار هله الده امکانی گلسون

گورمگه قانلو اعضانی گلسون

سسله دون وا اخا یا ابوالفضل

دوشدی الدن لوا یا ابوالفضل

غم غم اوستوندن اَظهر گلوبدی

دادیوه مام اَطهر گلوبدی

فاطمه الده معجر گلوبدی

سویلویبدور آنا یا ابوالفضل

باشدا واردور یارا یا ابوالفضل

گلمیشم سینمی داغلیام من

جان دیم اوخشیام آغلیام من

یاره وی خشک ایدم باغلیام من

ایلیم هم دعا یا ابوالفضل

قانوی حق آلا یا ابوالفضل

آغلارام دویمارام آغلاماقدان

عاجزم یاره وی باغلاماقدان

یاندی قلبیم ئورک داغلاماقدان

شاهدیمدور خدا یا ابوالفضل

باتموسان بس قانا یا ابوالفضل

باشلورام بوردا من شور شینی

سسله امداده گلسون حسینی

سنده گور منده نور دو عینی

لشکر هاردان هارا یا ابوالفضل

تیز گله قویسالا یا ابوالفضل

ویردی دشمن عمودی باشوندان

قان آلوب سبقتی گوز یاشوندان

ایستدون سن کمک قارداشوندان

سسلدون گل اخا یا ابوالفضل

قالمامیشدی قوا یا ابوالفضل

گلدی امدادوه گوزده قان یاش

گوردی قوللار دوشوبدور سینوب باش

سسلدی وای بئلیم سیندی قارداش

قدیم اولدی دو تا یا ابوالفضل

چالدی اَل اشقیا یا ابوالفضل

بس ((ملک پور)) گلور آه و وایه

وار یئری ایتسه مولا گلایه

ایستمیر سوز ندن کربلایه

اوردا دوتسون عزا یا ابوالفضل

مطلقاً وار صفا یا ابوالفضل


برچسب‌ها: ملک پور
+ نوشته شده در  جمعه ۱۷ اسفند ۱۴۰۳ساعت   توسط حاج محمد محمد قاسمی  |