|
وداع حضرت علی اکبر (ع) با مادرش چوخ باخما منِ مضطره خوشگلدون اوغول گئت دیدار قالور محشره خوشگلدون اوغول گئت وئرمیش شه لب تشنه سنه رخصت میدان گئت دورما دایانما على لیلا سنه قربان باخما منه باخدوقجا یانوب ائیلرم افغان آهیم چیخا گر گوگلره خوشگلدون اوغول گئت گل بیرده ویروم من او سر زلفووه شانه بیر تار الیمده قالا تا اینکه نشانه گر اولسا الیمده یترم عزت و شأنه بسدور او منِ مضطره خوشگلدون اوغول گئت خوشدور منه جسمون دم پیکانیله دولسا قرآن کیمی جسمون علی شیرازه دن اولسا بو زلف مطرّانون اگر نظمی پوزولسا نعشون دوشه باش سیز یره خوشگلدون اوغول گئت من گئچمیشم اوّلده على سن تک اوغولدان ممکن دگی لیلا قویا پا دیشره بو یولدان گئت قوی بو قوشون هم ورا ساقدان همی صولدان صبر ائت ستم لشگره خوشگلدون اوغول گئت اولسون دیرم من آنالیق حقّی حلالون گورسم بویانوب قانیله بوشوخ جمالون باشون یاریلوب قوش کیمی سینمیش پر و بالون قانون دولوب اول گوزلره خوشگلدون اوغول گئت بیر جمع على ائتدی فدا جان شه عشقه اول سنده دلیل آل خلیله ره عشقه قوی توکسون عدو قانوی قربانگه عشقه فخر ائتسون آنان هاجره خوشگلدون اوغول گئت فکر ائیلمه سندن صورا من قالّام اوغولسوز سن سیز منه همدم اولی بو آه جگرسوز گئت دورما علی قویما بو شاهنشهی یالقوز امداد ائیله بو سروره خوشگلدون اوغول گئت آماده دوروب قتلووه بو لشگر اعدا قوی شوقیله میدانه قدم ائیلمه پروا عشقونده رضادور على مجنون کیمی لیلا دوشسون یئری وار چوللره خوشگلدون اوغول گئت مشگلدی فراقون ز بس ای شبهِ پیمبر دورموش حرم اهلی هامی محزون و مکدّر سسلر هاموسی گئتمه اماندور علی اکبر باخما اوجالان سسلره خوشگلدون اوغول گئت (( عاصی )) یتوب از بسکه سنه درد و مصیبت فکرون سنون اشغال ائیلیوب کثرت محنت واضحدی حسینون سنه وار لطفی حقیقت یازدون بو سوزی دفتره خوشگلدون اوغول گئت ****** مرحوم عاصی تبریزی برچسبها: حسن عاصی
+ نوشته شده در دوشنبه ۲۰ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
