‍ زبانحال حضرت ابوالفضل (ع)

سو قولی قیزلارا وئردیم حسین جان

فراته وارد اولدوم من لب عطشان

سو مشکین دولدوروب چیخدیم شتابان

اؤزوم سو ایچمدیم اول لحظه قارداش

گلیردیم آلدی دوریم قوم او باش

یولوم هر دورد طرفدن اولدی مسدود

دگوب اوخلار توانیم اولدی محدود

آغیر میدان اوزاق یول چاره معدود

ستملن قوللاریم دوشدی بدندن

گئنه ال چئکموری اشرار مندن

رواندی چشمه تک هر یاره دن قان

آلوب آرامیمی شمشیر و پیکان

اوجالدیر هلهله افلاکه عدوان

علاجیم قطع اولوبدی هر طرفدن

گوتورمور اوخ آتانلار ال هدفدن

گئنه جسمیم اولور هر آن نشانه

خدنگ و خنجر و تیر و سنانه

یارالی پیکریم غلطاندی قانه

گوزوم یولدا اورکده آه و افسوس

قولومدان اولموشام میداندا مأیوس

دگوب بیر اوخ سو مشکیم پاره لندی

بدن یارئیدی قلبیم یاره لندی

ایشیق گون گؤزلریمده قاره لندی

بو غم سقادن آلدی صبر و طاقت

سوسوزلاردان عجب اولدوم خجالت

آدیم سقا سویوم یوخ لبلر عطشان

باخور نهره گوزوم زار و پریشان

قولوم پیکرده یوخ سینمده دی جان

حسین سندن واریمدی بیر تمنّا

منی قویما دم آخرده تنها

گرفتار اولموشام صیّاد الینده

اسیرم فرقۀ بیداد الینده

باشیم قارداش قالوب جلاد الینده

امانیم یوخدی سایسیز تیرلردن

وجودیم دوغرانوب شمشیرلردن

اگر فریادیمه گلسون یوبانما

منی سال یاده تلّ اوسته دایانما

هجوم کوفیانی سهل سانما

یوبانسون گر قالار اللرده باشیم

یولا گوز تیکمه سین دئ آل هاشم

یارالی قلبیمی آلام سیخدی

جفا اندازه دن نهر اوسته چیخدی

عمود عبّاسوی توپراقه ییخدی

اگر گورسون بو دشتی لاله رنگی

بیلرسن نیلیوب منلن اوزنگی

دوشنده توپراقا زین اوستن امّا

اشیتدیم بیر صدای محنت افزا

اوغول وای سسلیور گوردوم کی زهرا

یئره دوشمه دئیور عبّاس اوغول گل

یارون چوخدی سینم اوستونده دینجل

سنه قربانم ای شاه ولایت

گل آز قالدیم ائدم درک شهادت

بیلورسن ایلمزدیم من جسارت

نه نم زهرا گلوبدی قوی دئیوم فاش

عجب بیر گلمه لی موقعدی قارداش

******

مرحوم عبداله رضائی ( غمکش)


برچسب‌ها: عبداله رضایی غمکش
+ نوشته شده در  دوشنبه ۲۰ اسفند ۱۴۰۳ساعت   توسط حاج محمد محمد قاسمی  |