زبانحال امام موسی بن جعفر (ع)

سِندِ ظالمین الیندن گلدیم الامانه الله

یوخ دئین که رحم قیل بو پیر ناتوانه الله

اون بیر ایلدی بو مکاندا مونسیم اولوبدی غملر

حالیمه یانان تاپیلمیر خاطریم اولوب مکدر

چوخ منه ستم ائدیب بو سندی ظالم ستمگر

پیکریم اسیر گورنده الده تازیانه الله

وار ایاقلاریمدا کنده بوینوما ویریبلا زنجیر

محبسین هواسی ائیلیب من غریب زار و دلگیر

تنگه گلمیشم بو یئرده اولموشام بوجانیدن سیر

کیم دوزر بو قدر جور و ظلم جانستانه الله

گور نئجه شقی بو هارون منله ائیلییر عداوت

یوخ دئیین غریب امامه ائتمه بیر بئله اذیّت

بو ستمگرین او قدری قلبینی دوتوب قساوت

عالم بقانی بیلمور مست اولوب جهانه الله

حالیمه منیم بو یئرده سن سن ای خدا گواهیم

بیر قوجا غریب امامم ذرّه یوخ منیم گناهیم

یوخدی سندن آیری کیمسه بیر پناه و داد خواهیم

سن قوتار منی بو غمدن دویموشام بو جانه الله

ای خدا اوزون بیلیرسن زار و پیر ناتوانم

محبس جفاده جانیم تنگه گلدی باغری قانم

دلشکسته قیزلاریمدان اون بیر ایلدی ناگرانم

قووزانور شرار آهیم دودی آسمانه الله

اون بیر ایل منی بو هارون سالدی رنج بی شماره

دوزموشم بو اون بیر ایلده بیر بئله غم و فشاره

نیسگلیم بودور که ئولسم کیم قویار منی مزاره

جان وئرنده باشیم اوسته کیم گلر فغانه الله

کاش آنام گلوب او حالده بو غریبه آغلیایدی

وای غریب بالام دئییدی بوردا سینه داغلیایدی

جان وئرنده اوز الیله گوزلریمی باغلیایدی

اوخشیایدی من غریب زار و باغری قانه الله

هم بالام رضا گلیدی رو به قبله دوندریدی

دفن و کفنیمی ائدیدی غسلومی اوزی وئریدی

هم ایاقلاریمدا کنده یاره سین آنام گوریدی

آغلیایدیلار منه بو یئرده یانه یانه الله

کنده زنجیرین عذابی جسمیمی سالوب رمقدن

اوخشور اول کتابه جسمیم جلدی آیریلار ورقدن

قوخموری شقی بو هارون دادگاه روز حقدن

اعتقادی یوخ معاده آند اولا قرآنه الله

(( قنبری)) گورنده محبس نی کیمین گلر نوایه

یاد ائدر غریب امامی آهی اوج ائدر سمایه

گوز یاشی توکر عذاره آغلار آل مصطفایه

محشره گلنده اولسون الده بیر بهانه الله

******

اکبر قنبری تیکمه داش


برچسب‌ها: اکبرقنبری تیکمه داش
+ نوشته شده در  دوشنبه ۲۰ اسفند ۱۴۰۳ساعت   توسط حاج محمد محمد قاسمی  |