|
زبانحال حضرت رباب (س) با حضرت علی اصغر (ع) سوال و جواب زبانحال حضرت رباب (س) قلب ربابی ناله ایلن داغلاما علی اخیامیده سوسوزدی هامی آغلاما على یاندیرما بو یانان ئوره گی دود آهیدن آهون چیخار دومان کیمی بو خیمه گاهیدن شش ماهه یوسفیم باخوسان قعر چاهیدن یعقوب کربلا علی جان یاد إئدر سنی شهزاده سن بو غصّه دن آزاد ائدر سنی دریا کیمین گوزون آخنور سو کنارینه گوز یاشی داشلانور توکولور غم غبارینه لعنت بو چرخ کج روشین کج مدارینه یاندیردی تشنه لیک سنی بو چرخ یانمادی رأیونجه چرخ کج روش اصلا دولانمادی رنگون طلای زرده دونوبدور فشاریدن غم دوروی آلوب بالا دورت بیر کناریدن اغیار وار اوغول ، آیرور یاری یاریدن نالون کسیلدى شدت آه و فغانیدن ای گول سو ایسته مه بو سوسوز باغبانیدن سنگین اولوب چکنمیوسن بار عشقووی ای درّ عشق ، داده چاغور یار عشقووی آگاه ایله بو درّه خریدار عشقووی صرّاف عشق آلار سنی الان قوجاقینه آغوش شهده سن گئدوسن سو سراقینه ناخون عشقی وورما على غم دوتان داغا فرهاد عشق اولوبسان أوغول صود چیخارتماقا قربان اولوم او گوز یاشووا قانلی دیرناقا ویردوقجا تیشه صود یرینه قان چخار على روحیم دوشوب فشاره منیم جان چخار على ای کوه کن بو کوه خون آلوده ویرما چنگ شرمنده ام خجیلم اوغول إئتمه منله جنگ چارم آزالدی باشیمه دنیا اولوبدی تنگ هم من دئمم فشاره دوشوب جانیم آغریور اولسون قسم او جانووه پستانیم آغریور آهسته آغلا قوی سسووی دشمن آلماسین اخیامیدن بو ناله کناره اوجالماسین هئچ کیم علی آنون قالان احواله قالماسین تئز تئز باخوب منیم یوزومه آغلاما على سیلِ سرشگووی یوزوه باغلاما على یوخدور دوشومده صود بالا سندن خجالتم من بی وفا آنا دگولم کنز محنتم دریای غمده من على غرق مصیبتم بو قدری آغلاما منی آغلار قویان بالا بو داغلى قلبین اوستونه داغلار قویان بالا قانلو دوشوم دوداقلاروی قان إئدوب على قانه بویانماقی سنه آسان إئدوب على نوحون محیط عشقیده طوفان إئدوب على اما دوشوبدی کشتی طوفان تلاطمه طوفانیده قالوبدی حسین ابن فاطمه ای گلستان عشقه منیم غنچۀ تریم بو فکرى إئتمه ای سوسوز آهویه بنذریم یوم گؤزلرون دیوم سنه من لایلای اصغریم گهوارووی رقیّه سنون ترپه در بالا لایلای دیوب دل آچماقووی ئورگه در بالا لابلای سسین إئشیتمیوسن یا که یاتموسان یوخ دوشلریمده صود منی سن گوزدن آتموسان سو قان اولیدی گؤز یاشووی قانه قاتموسان هر دم دونوب باخورسان على نهر علقمه عباس عمون سو اوسته ئولوبدور سو ایستمه بیر ذرّه استراحت إئله راحت أول بالا هم صحبتم سنیله من هم صحبت اول بالا صبر إئت بلایه آز بئله بی طاقت أول بالا ایسلاندی گوز یاشونلا منیم قاره معجریم یاندیردی بو یانان ئوره گیم یاندیم اصغریم من هئچ ، بو قدری آغلیوب آغلاتما عمّه وی قلبیم یانور اوجالتما بئله آه و ناله وی نقش ایلیوم ئوره ک باشینا غملو نقشه وی قوی باشوی علی ایکی پستان آراسینا گوز یاشی مرحم ایلمه دیرناق یاراسینا جواب حضرت علی اصغر (ع) اولسیدی دل ، آچاردی بو نوعی گلاییه سن ساخلیانمدون منی ویر آیری داییه قلبیم یانور من آغلیورام آغلاما نه نه بو داغلى قلبی ناله ایله داغلاما نه نه قوى أل ایاق چالوم ألیمی باغلاما نه نه ایستی هواده تاب إئله سون صود امر نئجه من تشنه ام بیلورسن آنا اوچ گون اوچ گئجه گوردوم دیار عشقیده مظلومه سن نه نه صود یوخ دوشونده باری سو وئر چاره إئت منه گول صولسا باغبان سو وئرر غملو گلشنه یانسا اگر منه ئوره گون یانه یانه دئ اصغر سوسوزدی درد و غمین باغبانه دئ بس هاردادور آنا بیر ایچیم سو آلان منه عطشاندی آغلیور همامی لابلای چالان منه دوره مده یوخدی هئچ بیری سن سن قالان منه اکبر یاتوب عباده گره ک من اویاندیرام اونلان گئدوب لباسیمی قرمز بویاندیرام إئتدون عوض لباسیمی قربان اولوم سنه چوخ راضیم بو باره ده لطف ایلدون منه بوندان صورا یوخومدی منیم زحمتیم سنه مندن صورا نه آغلا نه فکر و خیال إئله جانیم یتوبدی سینمه حقّون حلال إئله زندانیم بو دار فنا محبسیندیم گهواره محبسیم دی خیَم گوشه سیندیم نوبت یتوبدی من شهدا جرگه سیندیم چوخ استفاده سی سنه وار دود آهیمون وار احتیاجی خیرداجا سربازه شاهیمون سیر اولموشام آز عمریده بو جانی نیلورم قربانووم دئمه منه قربانی نیلورم خشکیده لبلری قوری پستانی نیلورم من نیلورم آنا سنی ، سن نیلوسن منی مندن صورا سوسوز قالا قویما رقیّه نی مندن ده چوخ سوسوزلوقون اوندا فشاری وار دیلدن دوشوبدی دیلده اونون آه و زاری وار دردین دینمیور إئله شأن و وقاری وار آب و غذا تهیه إئله آج قالان قیزا سو ایسته سه سو ویر منه لایلای چالان قیزا ****** مرحوم حاج مختار نخستین اردبیلی برچسبها: مختار نخستین اردبیلی
+ نوشته شده در سه شنبه ۲۱ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
