|
اربعین حسینی اربعینین دور گوز آچ ایله عنایت یا حسین قبریوی زینب گلوب ائدسون زیارت یا حسین گرچه زحمت دور وجودون یاره دور باشدان باشا عفو قیل چارَم ندور چوخدور علاقَم قارداشا بو علاقَم دور سالان بیر عمر یورقون داغ داشا حشره تک وار منده بو عشق و ارادت یاحسین باش گوتور بیر قبردن لطف ائت باجون، قارداش گلوب ناله سیندن نالیه چوللرده کی داغ داش گلوب شامدن کرب و بلایه یوللاری بیر باش گلوب سرّی واردور ئولمیوب قالدیم سلامت یاحسین ئولمدیم قالدیم جهاندا رنج گوناگون گورم نیزده سن ناقه ده من دشتیله هامون گورم کوفه شهرین نامنظَّم شامی بی قانون گورم رنگیدن رنگه قالام ساعت به ساعت یاحسین کربلاده کاش او گون مستور اولیدی گوزلریم پرده ، پرده لخته قانیله دولیدی گوزلریم گلشنی گورجک خزان گل تک سولیدی گوزلریم گورمییدیم سولدی گلزار ولایت یا حسین هانسی مُشکلدن دیوم گَلمز سایا مُشکل لریم سولدی شام و کوفه ده پاییز گورموش گوللریم گلدیلر نی تک نوایه غصّه دن بلبل لریم گوردیلر گلشنده یوخ ذوق و طراوت یاحسین اهل شام و کوفه ، بی فرهنگ دور فرهنگده تک دیلر دنیا یوزونده رنگده نیرنگده گون لرین باشه وئریبلر بزم جنگ و جنگده گوزلرین کور ایلیوب رنگ جهالت یاحسین آرزویه چاتمادیم قالدی اؤرکده نسگلیم هانسی نسگلدن آچوم سوز شرحینه گلمیر دیلیم اوسته لندی غم ، غم اوسته اولدی مین بیر مشگلیم لحظه لحظه مشکلات اولدی زیادت یاحسین یاد عبّاسیله خاطردن چیخارتدیم هر غمی شامده آچدیم بوکولموش قانلی گوز گوز پرچمی قبریوین شوقی یاراتدی منده اؤزگه عالمی باشلادیم یول باشدا سودای زیارت یا حسین ذکر هو حق باعث اولدی خالق امداد ایلدی قید دشمندن بیز اهل بیتی آزاد ایلدی حضرت حق رحمتون مشمول سجاد ایلدی کفری نابود ائتدی اعجاز امامت یا حسین سجدۀ شکر ایلرم اوز دولت اقبالیمه چاتدیم آخر دولتوندن اول آمالیمه هجر اوتوشدی وصله یئتدیم مرحبا احوالیمه چخدی یادّان گوردوقوم رنج و ملامت یاحسین آیریلوب مدّتدی زینب سن کیمی دلداردن کاسه کاسه قان اودوب هر لحظه هجر یاردن کیم بیلور چکدیم نلر بو مدّتی اغیاردن هر نفس غربتده گوردوم مین قیامت یاحسین سالک کوی وفایه توشه سیزلیق توشه دور کیم علایقدن گئچوب خرمن گوزونده خوشه دور قبر دورد گوشه اولار بو قبر آلتی گوشه دور اوزگه عالمدن ائدور قبرین حکایت یا حسین زینبه مین راز ائدور بو طرح قبرین بر ملا دفن اولوب پائین پاده اکبر گلگون قبا سینه وی گهواره ائتدون حشره تک بیر مه لقا آلتی آیلیق اصغر ائتسون استراحت یا حسین عالم امکاندا یوخدی قبریوین ماهیّتی تک نه ماهیت جلال و عزّت و کیفیّتی خاصه بیماره شفا دور بو مزارین تربتی کیم ائدور هر درده درمان و طبابت یا حسین ای طبیب درد عالم دیدۀ خونباریله کربلایه گلمیشم بیر قافله بیماریله جمله بیماروق کرم قیل کاروان سالاریله تک به تک درد اهلیوخ ایله عنایت یاحسین ملک عالمده نه عنوانه طبیبیم زنده یَم بو حیاتِ عاریتدن من اوزوم شرمنده یَم زینبون ئولسون نجه سندن صورا پاینده یَم ئولدورر من ئولمَسَمدَه بو خجالت یاحسین بوالعجب بیر ماجرادن اولموشام مبهوت من علتین کشف ائت منه ای کاشف سرّ و علن قبری قبروندن ابوالفضلین اوزاق دوشموش ندن وار نه حکمت قیل اؤزون رمز و اشارت یاحسین اولمادی مشکینده سو سقّای آل بو تراب خجلتیندن ائتدی بو آرامگاهی انتخاب یا ادب ائتدی رعایت معرفت اولدی حجاب فاش قیل سرّین ندور بعد مسافت یاحسین قبرینی گورجک منه شرح ایلدی بیر او گه حال اصغرین گر گورمسیدیم قبرین ایلردیم خیال بو بالا قبر اصغریندور فکریمه گلسون محال بو مزار ایچره یاتوب اول سرو قامت یاحسین بو کیچیک قبر ایچره گوردوم بیر بُیوک دنیا یاتوب ما سوالّهی آتوب گوزدن بئله تنها یاتوب شرم اولوب باعث دوشوب سندن اوزاق سقا یاتوب مشکینی گوز گوز ائدوب تیر عداوت یاحسین عفو قیل درده گتوردوم قلبیوی ائتدیم گله غصه لر ناچار ائدوبدی یوخسا گلمزدیم دیله اوزگه عالمده گلوب شاماتیدن بو قافله درد دل ائتماقدی قصدیم نه شکایت یاحسین ئولدی یوللاردا نئچه یول یورقونی یورقون بالان دوشدی مین درده علاوه ئولمیوب سالم قالان اولمادی غربت ولایتده بیزی یاده سالان هر کیمی گوردوق بیزه ائتدی جسارت یاحسین بو جسارت باعث اولدی شام حسرتخانه ده اوز الیمله بیر گهر دفن ایلدیم ویرانه ده عفو قیل اولسا قصوریم حفظ بو دردانه ده چوخ تلاش ائتدیم قالا سالم امانت یاحسین جور دشمن ائتدی قهراً باغریمی قان شامده باعث اولدی بیر قزون قالسون او ویران شامده کربلا ظلمون جهانه ائتسون اعلان شامده تا بولونسون نیلیوب اهل شقاوت یاحسین عشیقسیز (( شبخیز)) چکمز ملک عالمده نفس بو حقیقی عشق دور نه عشق صوری نه هوس عشق ، عشق اولیا دور، عشق آل اللهدی بس اؤزگه بیر عشقه بو عشقیله نه حاجت یاحسین ******
برچسبها: عباسعلی شبخیز قراملکی
+ نوشته شده در پنجشنبه ۲۳ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
