‍ زبانحال حضرت صغری (س) در فراق برادرش اکبر(ع)

الله منی آغلار قویوب اکبر سفرینده

باغریم بئله دونمزدى قانا هر سفرینده

یثربده گیدنده رخ زیباسینه باخدیم

سالدیم قولومی بوینونا سیماسینه باخدیم

ئوپدوم یوزینی نرگس شهلا سینه باخدیم

گللم دیمه دی جدّینه بنذر سفرینده

مدّتدی گوزوم یولدادی دنیاده مریضم

یوخدور سالانیم طایفه ده یاده مریضم

اکبردی طبیبیم فقط افتاده مریضم

بیر گل کیمی قویما اولا پرپر سفرینده

من گوزلریمی اشگیله دولدورموشام الله

یالوارماقا یردن ایاقا دورموشام الله

قارداشیمی هر آن سنه تاپشورموشام الله

من نیلیرم اولسا مکدّر سفرینده

مندن نظرون کسمه بنی هاشمه خاطر

زهرا عوضی عمّه مه قارداشیمه خاطر

یثرب گوزلین حفظ ائله گوز یاشیمه خاطر

دل یاندی شرار غمه دلبر سفرینده

هجرت گیجه سی اکبره یالواردوم آپارسون

عبّاس وفا پروره یالواردوم آپارسون

هر ماه ملک منظره یالواردوم آپارسون

ردّ اولدی سوزوم آل پیمبر سفرینده

گُول یوزلی مسافرلریمی ساخلا خطردن

گَلمز خبر اصلا وطنه شمس و قمردن

قلبیم دویونر چوخ نگرانم صود امردن

قیرخلیدی قوجاقدا علی اصغر سفرینده

گُول صاحبی دردی چمنیندن گل آپاردی

گوردوم من اوزوم هر گُولینه بلبل آپاردی

غم قافله سینده نئچه شیرین دیل آپاردی

گوزدن منی سالدى شه محشر سفرینده

رحم ایله آچیلسون گینه ده باغلی اتاقلار

دگسون اطاقین فرشینه پاکیزه ایاقلار

گلسون ائلیمین دیدینه یثربده قوناقلار

بیر عمریدی قلبیم یانور ائللر سفرینده

گوردوم گیجه بیر قانلی بیابانی یوخومدا

گوردوم من على اکبر زیبانی یوخومدا

دولموشدی گوزل گوزلرینه قانی یوخومدا

قویما وورولا باشینه خنجر سفرینده

عرض ایتدیم على حال پریشانووه قربان

دولموش نیه قان گوزلروره قانووه قربان

مندن سوزی گیزلتمه دانش جانووہ قربان

آخر باجیلار قارداشی گوزلر سفرینده

قاصد دولانار کوچه ده گلمز منه نامه

قاصددن على یولاموشام اصغره جامه

گوندردیم همان گون سنه ده عالی عمامه

عمّامه دیدیم قارداشیم ایستر سفرینده

صبریم ایوی آز قالدی الهی تالان اولسون

ساللام باشیما قاره یوخوم کاش یالان اولسون

تا زندگیده فکریمه بیر کس قالان اولسون

ئوللم من على اکبر ئوله گر سفرینده

******

مرحوم معزی اردبیلی


برچسب‌ها: یوسف معزی اردبیلی
+ نوشته شده در  پنجشنبه ۲۳ اسفند ۱۴۰۳ساعت   توسط حاج محمد محمد قاسمی  |