‍ راه شام

(سبک: سو یوخومدی قیزلاروندان … )

امر ایله ئوزون دایانسون ، غملی کاروانی عمّه

قالمیشام بو چولده الان ، دل دونوبدی قانه عمّه

کوچ ائدوب گئدوبسن الان عمّه سندن هئچ خبر یوخ

قالمیشام بو چولده تنها کاروانیدن اثر یوخ

بیلمورم هایاندی بو یئر بیر بئله یئره گذر یوخ

قیل نظر عنایت ایله سن بو خسته جانه عمّه

قالدی خیردا بیر سفیرون گوزلرینده اشک حسرت

بیلمورم نه سمته گیتدون عمّه ای سحاب رحمت

من غریبی سالما گوزدن ای منه مدال عزت

سایه وی جهاندا ویرمم کل بو جهانه عمّه

همرهین بو چولده قالدی قورخورام اماندی گیتمه

رنگی گول کیمی سارالدی قورخورام اماندی گیتمه

گون باتوب هوا قاردالدی قورخورام اماندی گیتمه

اشک خون آخار عذاره گلّلم هی فغانه عمّه

درد و غصّه لر الینده عمّه گور نئجه اسیرم

خسته دی بو جان بدنده روزگاریدن ده سیرم

قویما سن قالام بو چولده شامیده سنه سفیرم

هئچ دئمورسن هاردا قالدی خیردا نازدانه عمّه

کربلا چولونده عمّه غارته گئدوب جلالیم

غصه مرگ ائدر بو طفلی باشه یتمین ملالیم

صرصر بلا اسوبدی گول کیمی صولوب جمالیم

باخماسان منه یقیندور گول گیدر خزانه عمّه

بو چولون هواسی غمدی بیر نفر بیر آشنا یوخ

کربلا کیمی هوادن غم یاغور داخی صفا یوخ

قورخورام هرایه تئز گل آشنا و رهنما یوخ

اکبریمدن اصغریمدن قالدی غم نشانه عمّه

جانه دویموشام جهاندا روزگاره وار گلایم

مهربان علیِّ اکبر گول عذاره وار گلایم

گیتدی باخمادی دالیجا شهریاره وار گلایم

اشک غم آخور عذاره ایندی دانه دانه عمّه

سالدی غم منی جهاندا چوخ فشاره نیلمیشدیم

سالمیشام بو سنّیلن من باشه قاره نیلمیشدیم

ظلمیله ئورک باشیندان دگدی یاره نیلمیشدیم

سن منی گوزوندن آتما وور باشیما شانه عمّه

غملره بو دشت غمده صید تک شکارم عمّه

سنّیم آز ولی غمیم چوخ بسکه اشکبارم عمّه

قارداش و آتا غمینده گور نه داغدارم عمّه

گل منی چیخاتما یاددان گوهر یگانه عمّه

ای رقیّه ای حسینه پر بها یگانه گوهر

درد الینده قویما قالسون بیقراریدور بو نوکر

هم وطن غریبی اولموش هم نشان تیر دیگر

سن دئنن ئوزون نظر قیل غملی نوحه خوانه عمّه

******

محمد رضا بیگلی (رضوی زنجانی)


برچسب‌ها: محمدرضا بیگی رضوی زنجانی
+ نوشته شده در  پنجشنبه ۲۳ اسفند ۱۴۰۳ساعت   توسط حاج محمد محمد قاسمی  |