‍ اربعین زبانحال حضرت زینب (س)

ای فاطمه مارالی ای وای حسینیم ای وای

گلدی باجین عزالی ای وای حسینیم وای

دور قبرین اوسته گلدی شوقیله غم قطاری

عزم ایلیوب اسیران کرب و بلایه ساری

ای کاش گوروم ئولونجک اول صحن با وقاری

یوخ زینبون مجالی ای وای حسینیم ای وای

چیخدیم مسیر عشقه , عشقونله پا پیاده

یثربده کی جلالیم یولدا دوشوبدی یاده

چوخ یورقونیدیم اما ائتدیم ولی اراده

دیندیر بو خسته حالی ای وای حسینیم ای وای

قلبیم یانیردی نار هجران و غربتیله

آلچاق اوجا مسیری گلدیم نه زحمتیله

دیللر اَسوردی گاهی شوق زیارتیله

سن معرفت کمالی ای وای حسینیم ای وای

گون گر دوتولسا ناگه اولدوز سماده یانماز

هیچ باجی من تک الله آواره چولده قالماز

مین یول ئولوب دیریلسم درد و غمیم آزالماز

ای زینبون هلالی ای وای حسینیم ای وای

من تابع و مرید دستور عشقین اولدوم

عشاق ایچینده گزدیم درگیر عشقین اولدوم

سن عشقیدن دانیشدین, تفسیر عشقین اولدوم

یوخ عشقیوین مثالی ای وای حسینیم ای وای

بیر دسته خسته جیران زوار سنه گتیردیم

بلبلری حسین جان بو گلشنه گتیردیم

اصغر آناسین آخر بو مدفنه گتیردیم

پوزدی خزان جلالی ای وای حسینیم ای وای

دوزدی که بعد غارت یانمیش خیمده قالدیم

پیراهنون عزیزیم عدوان الیندن آلدیم

من محمله حسینیم عفو ایله باشی چالدیم

گلدیم باشی یارالی ای وای حسینیم ای وای

بیر غنچه تازه آچمیش گول قالدی گلستاندا

سسلوردی گل بابا جان نصف گیجه یاتاندا

گاهی دیردی عمه قالدی بابام هایاندا؟

دیلده قالوب سوالی ای وای حسینیم ای وای

اوچ سنّیده رقیه آماج غارت اولدی

قانلی دوداقین ئوپدی مشتاق وصلت اولدی

یومدی گوزون او لحظه جان وئردی راحت اولدی

یاتدی حرم غزالی ای وای حسینیم ای وای

قرخ گوندی یابن زهرا گلمور سسون قولاقه

ایله نظر یارالی بو غمکش فراقه

دور اربعین اولوبدی خوش گلدین ائت قوناقه

ای مدفنی صفالی ای وای حسینیم ای وای

عکسین تجسم ائتمک بو قلب زاری داغلار

گوررم رباب سو اوسته اشگین عذاره باغلار

گوی آغلیوم دویونجاخ قارداشه باجی آغلار

دوشدون ندن آرالی ای وای حسینیم ای وای

باخ اربعین حسینیم دیدار امت اولدی

ایثار و جانفشانین الگوی غیرت اولدی

مولا ((خدایی)) آخر بو ایلده حسرت اولدی

وار کربلا خیالی ای وای حسینیم ای وای

******

حسین خدایی زنجانی


برچسب‌ها: حسین خدایی زنجانی
+ نوشته شده در  پنجشنبه ۲۳ اسفند ۱۴۰۳ساعت   توسط حاج محمد محمد قاسمی  |