|
زبانحال حضرت فاطمه صغری (س) در خروج از مدینه ایتمیسن قارداش علی مندن عیادت سن اگر لطفووه قربان ندن بس گیمیسن رختِ سفر؟ من بیله بیر ساعتی هر ساعت و هر روز و شب سجده ده حالِ دعاده حقدن ایلردیم طلب وصلوی لطف ایتدی حق ، هجرانه نه اولدی سبب آیریلیق طرحین چکوبدور یوخسا نقاشِ قدَر سن اولان یرده ملال اولماز بونا یوخدور سوزوم شوقدن آغلار اودور وجهی بو شدّتله گوزوم آغلادور وصلون منی ، گور هجره ممکندور دوزوم هانسی باجی من کیمی قارداش فراقنده دوزر؟ اولموشام گر چه نه مدّتدور مریض و بستری لیک لازم دور دوروم ایندی یغوم بو بستری اولماسون قلبون ملول ای صبحِ عزّت اختری یتمه سون بلکه صفالی گوگلووه گَردِ کدر یاتماقیم ترکِ ادبدور یوخ بونا جای کلام لیک قالموب قدرتیم ای مظهرِ خیرُالاَنام تا دوریدیم خدمتونده ایلیدیم بیر قیام باجی قارداش خدمتیله افتخار ایتمز مگر؟ هر قدر ناز اولسا سنده منده وار آرتوخ نیاز بولمدیم بو لطفِ محضون ای خدیوِ دلنواز خسته جانیله سنی یوخسا ایدردیم پیشواز سو سپردیم اشکیله یاتسون غبارِ رهگذر اشگِ چشممدن ملول اولما عزیزیم وجهی وار دوزموشم زَر فام عذاره دُرّ تک اشکِ شاهوار مقدمِ شهزادیه لازمدی اولسون دُر نثار اشکدن آرتوخدی آیا هانسی بیر دُرّ و گهر؟ بیرده بو رنج و مرضدن ایتمرم اصلا گِله نیلورم ، حاذق طبیبه احتاجیم یوخ گیله سن که گَلدون گیتدی دردیم ، گَلدی بهبودی اله دردیم ئولدورمز منی ، قالسان یانیمدا سن اگر من بو لطفه او گلَن یولاریوا قربان اولوم گَل رضا اولما دچارِ محنتِ هجران اولوم گیتمه قال ، تا خدمتونده هر زمان هر آن اولوم ناخوش اولسامدا گینه سن اولسان عمریم خوش گچر من بو فکریله علی دلتنگیدیم لیل و نهار اهلِ بیت ایچره آناسیزلیق منی ایلیوبدی خار نه باجی ایلر عیادت ، نه گلوب قارداش باخار نه اولور جویا عمولار ، نه گلر بیر عمّه لر ایندی بولدوم ایتموشم بو باره ده من اشتباه اولمیوب کم لطف لیخ سیزدن ولو بیر پرّ کاه کسمیوب مندن توجّه ، اقربا شهزاده شاه یانیمه بیر بیر گلور قوم و قبیله م سر به سر ای قدی سروِ چمن ، زلفی سمن ، رخساری گُل مظهرِ ختمِ رُسُل ، صورت نمای عقلِ کلّ محضرِ شاهه شرفیاب اولماقیم ممکن دگل التفات ایلر منه امّا او دیداره گلر رنگِ آلیمدن مُبرهَندی اگر چه حالتیم گلسه شه دیداریمه آرتار و لیکن خجلتیم شه قباقینده قیامِ خدمته یوخ قدرتیم خدمتِ شاهی دوتوم شهزاده قیزلار چوخ سُوَر حسّ ایدنمز هر قدر اولسون بشر فکری دقیق شخصِ بیمارون نه اندازه اولور قلبی رقیق هر طریقیله اولا ، توفیقِ حق اولسا رفیق (( شأنی )) صغرادن شفا آلماخ یولین یاخشی بولر منکه چوخ سعی ایتمیشم بو نوحه اولسون دلنشین نا امید ایتمز منی صغرا ، علی اکبر یقین دردیمه بوللم ویرور قطعی شفا جان آفرین اوندا وار چشمِ امیدیم منده یوخ اوزگه نظر دوزدی درد و غم ِمصیبت ، شخصی ایلر نیک بخت اجر اولور آرتوخ نه اندازه مصیبت اولسا سخت خشک اولور چون شاخ و برگِ میوه دن عاری درخت قورخورام تیغِ اجل ایتسون منی بی شاخ و بر سگّز آیدی درد الیندن گولمیوب بیر آن یوزوم سهلدور گولموب یوزوم ، آغلار گیجه گوندوز گوزوم ائل سوزین نیلوم؟ دوتوم وار زحمتِ درده دوزوم ائل سوزی نیلر؟ اونی کیمدن سوروشماخ؟ کیم بولر؟ ****** مرحوم حسین شأنی تبریزی برچسبها: حسین شأنی تبریزی
+ نوشته شده در پنجشنبه ۲۳ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
