گنجینه قتیل العبرات(1)
گلچین اشعار مناقب و مصائب اهل بیت (ع)
|
رد اثاث غارت ایدوبدی عرض امامه او بی حیای دنی گیچن گیچوب اولان اولدی علی بغیشله منی او بی حیاده باخون حیله ائیله تلبیسه امام محضرینه پول قویوبدی بیر کیسه دیدی گیچن گیچوب اوخشاتما گوز یاشون سیله بونی ئولنلروه خون بها حساب ایله ولیک بولمدی ویرسه تمام دنیانی آناسی لیلیه باغلانماز اکبرین قانی ائدردی پرده دالیندان او حاله لیلی نظر ئورکلنوب دیدی ایوای اوغول علی اکبر نئجه اوغولسوز آنان تاب ایدر بو سودایه اوغول گوزوندن ایراق پول ویرولّه لیلایه مخدّرات بنی هاشم اولدولار مغموم دایانا بولمدی عبّاس باجیسی کلثوم دل آچدی دخت علی ایلدی یزیده خطاب عتابیله دیدی ای بی حیای خانه خراب اوتانموسان بولوسن هیچ نه خطّ ده یروسن حسینی ائولدوروسن لیک خون بها وئروسن زریله دولسا اگر سر به سر بو تحت سما محالیدور اولا عبّاس اللّرینه بها عروسه ویرسه له دنیاجه زینت و زیور اونون گوزینده اولار قاسمین بهاسی مگر حسینیدن صورا زینب جهانی نیلیه جاق سرشگی قانه دونوب خونبهانی نیلیه جاق ربابه ویرسه له مالین تمام دنیانین مگر حلال ائدر اوز اوغلی اصغرین قانین دیمه که یئرده او قانلار که توکموسن قالاجاق جزا گونونده آتام سندن انتقام آلاجاق بو سوزدن اولدی خجالت یزید بد فطرت امام ساجده یوز دوتدی باشلادی صحبت دیدی نه حاجتون اولسا دی من روا ائدرم روای حاجتیله قلبیوی رضا ائدرم امام نطقه گلوب سویلدی همان ساعت سنه واریمدی بو گون یا یزید اوچ حاجت ازل بودور آتامین باشینی زیارت ائدم همان زیارتی سرمایۀ سعادت ایدم ایکیمجسی منی ئولدورماق اولسا میلون اگر معیّن ائت حرمه بیر نفر امینِ سفر علی عیالینه اولسون مواظب و همراه جوار احمد مختاره گیتسون آل الله اوچومجی کرب و بلاده سپاه بد فطرت آتام ئولن گون ائدوبلر حرملری غارت گرک بیزه اولونا ردّ اول غنیمت لر نچونکه واردی اولاردا زنانه زینت لر یزید سویلوب ازلکه سوزوندی امر محال بیر اوزگه شهره آتان باشین ایتمیشم ارسال گورنمسن او باشی ای سلالۀ اطهار قوتار بو صحبتی قیلما بو مطلبه اصرار ولیک دیلده سنون قتلوه یوخومدی نظر سنیله یثربه گیتسون گرک مخدّره لر بویوردی سیّد سجّاد کی ستم پیشه ندور خیالون ائدرسن منه نه اندیشه بئله گمان ائدوسن بولمورم منِ مغموم که هاردا دور سر خونین سیّد مظلوم همان او یئر که او یئردیدی رأس پاک امام یوزین او منزله دوتدی امام ویردی سلام سلام اولا سنه ای مکّه و منا اوغلی سلام اولا سنه ای ختم انبیا اوغلی هوایه قالخوب او دمده سر منیر امام آتا باشی اوغولا ایلیوبدی ردّ سلام سلام اولا سنه ای دستگیر اهل جفا سلام اولا سنه یأبن خدیجه الکبری یزید گوردی بو اعجازی اولدی شرمنده دئدی امامه که ای ما سوا سنه بنده تصادفات زمانیله اولما پژمرده سنون که اولدی ایکی حاجتون برآورده اوچومجی حاجتی تکرار ایلمه اصلا سیزون خیاموز اولوب کربلاده چون یغما سپاه کوفه و شام ایلیوبدولر غارت هره برین آپاروب اهل شامدن قسمت نقدر اولسا سنه سیم و زر غرض وئرّم تمام غارت اولان مالوزه عوض وئرّم جواب وئردی یزیده شهنشه بطحا دگول منیم غرضیم مال دنیوی اصلا دیار کرب و بلاده اولار که قوم لجاج بیز اهلبیتیدن ایلوبله ظلمیله تاراج اولاردا بیر نچه زاد وار بیزه امانت دور گرکدی ردّ اولا مختصّ آل عصمتدور شریعت نبوی ده دگول بو امر روا زنانه زینتی نامحرمین الینده قالا مخدّرات حرم زیورینه نا محرم تصاحب ایلسه تاب ایلمزلر آل عبا آنام یانیندا علی قارداشیم چکر خجلت سپاه شامده گر قالسا معجر لیلا اوزاقدی غیرت عبّاسدن که کلثومین اولا لباسنه صاحب سنان و شمر دغا او کوینگیکه آنام فاطمه ایپین اَیروب آتام او کوینگی گیمشدی روز عاشورا ویریلمسه منه اول پاره پاره پیراهن بیر آه سردیله قیلّام هامی جهانی فنا مدینه یوسفی گرگان شام الینده ئوُلوب آتاسینا آپارام کوینگین گرک ایما او معجریکه بی بیم زینبون باشندیدی او معجری توخومشدی اوزی آنام زهرا گرک او مقنعه هر یاندادور بو گون تاپولا بتول قبرینه زینب گیدنده باشه سالا ایوینده ساخلیا خولی آنام بویون باقین اولار خجل آتاسندان آتام ولیّ خدا یزید گوردی که یوخ چاره عرض ائدوب گتورون اولار که کرب و بلاده ائدوبدولر یغما گلوبدی مجلسه بیر ظالم الده گردن بند بیر آیریسی گتوروب بیر قانا بلشمیش عبا بیری گلوب گتوروب زینبون لباسلرین اوجالدی پرده دالیندان فغان و واویلا بیری گلوب گتوروب پاره پاره بیر کوینک باخوب او کوینگه داد ایتدی زینب کبری نه کوینک اوخلار ایدوب مثل خانۀ زنبور سنان و تیغ مشبّک ائدوبدی سر تا پا آخوبدی صاحبینون بسکه قانی قان قوریوب ائدوب مُضرّج او ثوب عتیقی لخته دِماء ایکی الیله وُروب باشینه خانم زبنب دیدی حسین سنه بو بخت قاره جانی فدا بو کوینگوندی وجودونده نَقدَر یارا وار؟ شل اولسون اللّری کیم بیر بئله وروبدی یارا او دمده مجلسه پر شور رستخیز دوشوب قیامت عالمی اول بزمده اولوب بر پا بیری گلوب گتوروب مشگینی ابوالفضلین بیر آیریسی گتوروب الده بیرجه قانلی لوا قارشیدی بیر بیرینه فاطمیه لر یکسر اوجاتدی اهل حرم بانگ وا ابوالفضلا گتوردولر گلینون قانلو گوشواره لرین شکسته دلدن ائدوب نی کیمی عروس نوا یارالی دللرین آرتوردی سوز شین بو الم او قدر آغلادی دویدی مخدّرات حرم یزید حضرت سجاده ایلدی اخطار سنی بو گون ائدورم من ایکی ایشه مختار بو شهرده ائده سوز گر اقامت و سکنی وئروم عمارت عالی و بیر گوزل مأوا مدینیه گئدوسوز میلیله رضایتیله یولا سالوم سیزی چوخ عزت و جلالتیله دئدی امام قالام من بو شهرده هیهات دیوبله بوردا منه خارجی آدی کرّات مخیّر ائتسون اگر شهر شامی ترک ائدرم حرملری گوتوروب من مدینیه گئدرم خوشام مکانیم اولا یثربین دیارینده قالام مدینه ده اوز جدّیمون جوارینده ولی ئولنلریمه که سوسوز اولوب مقتول دویونجا آغلامیوب اونلارا بنات بتول گرک قاباقجا دوتاخ بیز بو شهرده ماتم عزا ئولنلرینه ساخلیا حریم حرم دویونجا اکبرینه آغلیا آنام لیلا آتام حسینه ائده ناله زینب کبری یزید وئردی اجازه قورولدی تازه اساس حسینه شامیده برپا اولوندی مجلس یاس دیار شامده برپا اولوب عزا خانه دئمه عمارت عالی همان او ویرانه خرابه نی دوشویوبلر اساس غم توکولوب خرابه نون در و دیوارینه قرا چکلوب بو فکریله که گئچن گونلره قصاص اولونا دویونجا باش آچیلا شیونیله ساچ یولونا دیریلره ویریلوب رسم ماتمیله اساس گیوبله باشدان ایاقه تمام قاره لباس مباد نسگل اولا قبرده گله درده رقیه نون چکلوب قبرینه قرا پرده بنا قویوبلار او گوندن که کون و امکانه گورونمیوب ایله مجلس ایله عزا خانه اوتوردی صدرده زینب دیلنده ناله و داد خرابه نین قاپوسین کسدی سیّد سجّاد گلوبدی عالم معناده حضرت طه یانیجا الده عمامه علی ولیّ خدا همان حسن که جفائیله اودلانوب جگری عزا دوتوبلا جوان اوغلونا اولوب خبری یارالی قلبنی تیر جفائیله دلدی اوغول دیه دیه بیر باش خرابیه گلدی هامی بولر بو سوزی چونکه رسم عالمدور تصور اولسا آیوق قلبه چوخ بُیوک غمدور دیوم که یانمیان اشخاص قلبدن یانالار علاقمند اولار عالمده قیزلارا آنالار الی قابرقالاریندا دیلینده واویلا گلوبدی زینبه سس ویرماقا خانم زهرا زبانحالیله گویا دیردی آغلا قیزیم یانوندا قمچی وُران یوخدی سینه داغلا قیزیم سینوب قابرقام اگرچه بالا سسیم گلمور ولیک ناله دن آشفته قلب دینجلمور حزین سسیله نشان نالۀ جرس ویرّم دِیَن زماندا حسین وای سسووه سس ویرّم او مجلس عکسی سماواته منعکس اولدی حسین سسیله حجابات و نه فلک دولدی چکردی گویده ملک لر فغان و ناله و آه ووراردی باشلارینا یرده اولیاء الله بهشتده چکلوب جار کشف اولوب مطلب حسینه شامده ماتم دوتوب خانم زینب آچوبلا غرفه لری دوردولار تماشایه اولاردا شور عزا سالدی خلد اعلایه نجه عزا که مجسّم اولان زمان نظره همان او مجلسین اوضاعی اود وُرار جگره عزاده رسمیدی بیر روضه خوان اولار امّا او مجلسین هاموسی روضه خواندی سر تاپا توکوبله مجلسه شور و نشور اساسلرین ئولنلرین سویولان اوخلانان لباسلرین نجه لباس زبس اوخ ووروبلا قوم شرور اولوب تمام مُشَبَّک چو خانۀ ی زنبور اولوب مقدمۀ داده کاشف مطلب اسیرلر شرفی فاطمه قیزی زینب یارالی قارداشنون کوینکین آرایه قویوب دِیَر شل اولسون او اللر که بو لباسی سویوب بو قدر کیم وُرولوبدور بو کوینگه پیکان دگوب وجودووه یکسر آخوب یریندن قان آدینی غارت پیراهن اهل کین قویدی بُلنمورم نجه دل سختمیش نجه سویدی بیر آیری سمتده کلثوم ایدر روان اشکین قویوب برابره عبّاسین اوخلانان مشکین آلوب الینه خانم بیر قانا بلشمیش علم دیور باجون سنه قربان منه گراندی بوغم باخان بو پرچمه ای صاحب هنر قارداش بُلَر وجودون اولوب اوخلارا سپر قارداش سالوب او مجلسه اوضاع شورش محشر کلید باب غم عمامۀ علی اکبر سالوب برابره هر بیر اسیر بیر جامه یتشدی لیلی مجنون نمایه عمّامه باسوب او دوغرانان عمّامه نی ئورک باشنا ویروبدی چشمۀ چشمینده اذن گوز یاشنا ایدور عوالمی مجنون عوالمین پیدا مقام عشقده مجنوندی شهرتی لیلا بهار ابری کیمی گاه گوزلری دولوری سووُموری ئوره گی قانلو ساچلارین یولوری گهی باشندا الی گه دیلینده وا وَلَدا اوغوشدورور ئورگین مجلسه سالور غوغا باخور اویان بویانا گه توکور سرشک بصر دیور فغانیله ایوای اوغول علی اکبر جهاندا بیر سنیدون نخل عمریمه حاصل تمام زحمتیمی ایلدی فلک باطل یارالارون گوزیمه هر نفسده جلوه لنور بلی اوغولسوز آنالار باشینا کول اَلَنور سالوب او بزمده هر بلبل ئوز گولون یاده سریّه شیون ائدردی بالاسی داماده باسوبدی سینه سینه طوی گونی گین کفنین قلجلاریله اولان پاره پاره پیرهنین ووراردی باشه دیردی اوغول عزاسیدی بو کفن اولوب بالاما گر چه طوی لباسیدی بو بو بس دگلدی آتادان یتیمیدی اوغلوم یتیم لیق غمی ائتمیشدی قلبیمی مهموم شکفته وقتی خزان یتدی اول گل یاسه مراده یتمدی دوندردیلر طویون یاسه ائدنده قاسم آناسی بو دللریله نوا ئورکلنردی یاناردی عروس بخت قرا اولوردی عفتی مانع اوجادان آغلاماقا شرار شعلۀ آهیله سینه داغلاماقا گلوردی شیونه گزلنجه سینه داغلاردی باخاردی گوشۀ چشمیله دلدن آغلاردی یاواش یاواش ائدوب افغان اولوردی نوحه سرای دیردی وای طوئی یاس اولان عم اوغلوم وای خانیملار آغلادی از بسکه زلفینی یولدی خرابه سهلیدی شامات شوریله دولدی هامی ائشیتدی که وار شامده بساط عزا دوتوب ئولنلره ماتم خلاص اولوب اُسَرا اولار که شامده اوّل گلوردی سرزنشه سالوبلار ئوزلرینی شکل تعزیت منشه دیردیلر بولاری خارجی بُلوردوخ بیز گلنده شامه ازل طعن ایدوب گُلوردوخ بیز گلون گئداخ بولارین ماتمینده تسلیته ویراخ تسلّی آچاخ دل تمام معذرته حنا یاخانلار اله باشه سالدیلار قاره گلوبله تعزیۀ اهلبیت اطهاره اناث شام گلوب دسته دسته فوج به فوج خرابه دن ایدوب افلاکه واحسین سسی اوج ائله ملردیله آهو کیمی مخدّره لر که سس وئروب اولارا آغلاشوردی دشمن لر ائدوبله یدّی گون اولاد مصطفی ناله هلاکت ئوز وئره آز قالدی خیردا اطفاله دئمه بو یدّی گونی بیر نفر ییوب یاتدی او قدر ایلدیلر ناله سسلری باتدی امام گوردی که بیر گونده طول چکسه عزا اولار هلاک خواتین یثرب و بطحا دوتوبدی رأیی علاقه عزا تمام اولسون آز آغلاسون بالالار ساچلارینی آز یولسون اگر چه شامیده یتسه تمامه بو ماتم تمام اولان دگی تا واردی صفحۀ عالم بتول نائبه سی زینبه یتوب بو خبر دوباره جوشه گلوب گوزلرینده خونِ جگر دئدی هنوز منیم دویمیوب گوزوم یاشدان گرکدی قارداشیمون ماتمین دوتام باشدان کسوک باشیله ئوزی گلمه سه او شاه زمن محالدور که یغام قارداشیم عزاسینی من ائدوم نه نوعیله کلثومه بو سوزی اظهار رشید قارداشیم عبّاس ماتمین قورتار بو بزمه گلمسه اکبر او مظهر طاها نجه اولور دوتا آرام ناله دن لیلا خبر وئریلدی یزیده که باشلاری گوندر سرشک چشم خواتینی قانه آز دوندر او وقت اولوب که بلا تیری دیللری دلدی عزانی یغماقا صاحب عزا ئوزی گلدی او حالیده که آخاردی عذاره قان یاشلار منوّر ائتدی عزا خانه نی کسوک باشلار قاباقدا بیر یارالی باش که چوخ منوّر دور یارالی باش دئمه توحیده عمده مظهر دور محاسنی بلشوب قانه وجهی گرد آلود ولیک آینۀ وجه ذات داور دور سالوبدی خطّ باشیندا خطوط منکسره جبینه باشدا اولان خطّ لر برابر دور آغیزدا اوخ یاراسی سجده گهده داش یاراسی بوغازدا نیزه یئری لاله ی احمّر دور هنوز وار لب لعلینده خیزران اثری قیزل گول اوسته هویدا بنفشۀ تردور عقیق لبلر اولوب ظلمیله زبرجد رنگ نشان چوب جفای یزید کافر دور دالنجا ارخه لنور چوخ هنرلی بیر باشه یقین بو باشه او باش صاحبی برادر دور او باشدا جلوه لنور چوخ شجاعت آثاری باخان بُولر که بو شاهه امیر لشگر دور اولوبدی قانیله سرشار چشم مرتضوی سر منیر ابوالفضل پور صفدر دور نه باش که کاسۀ سرده شکست لیق گورونور عمود نوفله حاکی جراحت سر دور ووربلا زهرلی اوخ سجده گاه انورینه کشیده قاشی کماندور مژه چو خنجر دور دولوبدی گوزلری چون مشک قانلو اشکیله گمان گئدور که بو سقای چوخ هنرور دور یوموبدی گوزلرینی گوئیا خجالتی وار سکینه دن سو خصوصنده چوخ مکدّر دور گوزون آچانموری باخسون خانملارین یوزونه عجب رشید دلاور وفالی سرور دور اونون دالنجا گلور بیر گوزل جوان باشی معاینه دیه سن صورت پیمبردور بشرده یوخدی وجاهتده مثل و مانندی ملکدی صورت انسانیله مصوّردور باشندا وار عربی زلفی خم بخم پر چین شمیمی رونق بازار عنبر تردور نه زلف عنبر چین و ختایه طعنه وورار سبب او زلفیدی مشک ختن معطردور دوشوبدی گوشۀ ابروده هاشمی بیر خال نه خال دانه و دام قلوب مضطردور ائدوبله باشینی تیغ جنائیله منشق قلیجلانوب باشی گویا باباسی حیدردور باتوبدی خال و خطی زلفی تل به تل قانه او حسن او خال او خط بیر اسفلی منظردور اناث شام او باشی گورنده سویلدیلر بولاردا کیم گوره سن بو جوانه مادردور؟ او قیز که ساچلارینی یولدی بو باشی گورجک بو بخت قاره یقیناً بو باشه خواهردور اوجالدی ناگه اوغول وای صداسی لیلانون دئدی بیر عمردور آدون دیلیمده ازبردور اونون دلالنجا بیر آی پارچاسی طلوع ائتدی نه آی یوزی دیه سن آفتاب خاوردور ئوزی جواندی قولاقنده قانلو حیدری وار قاشی ، گوزی ، یوزی ، صنع خدای اکبردور دیوللر آدینه قاسم حسن نشانه سیدور سریّه آدلو اسیره وفالی دلبردور گلوب او مجلسه اون یدّی یاش بو نحویله نه مجلس ، اوردا مجسّم بساط محشردور او بزمدن فلکه وا محمّدا اوجالوب یولوندی ساچ دیه سن بار مشک ازفردور بو حشری محشر عظمائیله ائدن تطبیق گورر نقدر بو اوندان بلند برتردور جزا شفیعه لری ساچلارین یولاردی تمام آچان او بزمده باشین بتول اطهردور نه گوردیلر او زمان ئوزگه محشر ائتدی قیام سبب او محشر کبرایه رأس اصغردور طبقده گتدیله بیر صود امر اوشاق باشی او آیلارین یانوجا بیر ایشیقلی اختردور امام عصری او باش آغلادور ائدونجه ظهور گیجه گونوز او باشا انتظار کیفردور (حسینی )) حضرت حجت بو قانی بیر گون آلار امام منتقم و منتظر مظفّردور نقدر وار نفسون خدمتونده ائتمه قصور نجات حشرده بو خامه و بو دفتردور ****** سیدرضا حسینی (سعدی زمان) برچسبها: سیدرضاحسینی سعدی زم
+ نوشته شده در پنجشنبه ۲۳ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
