|
راه شام- زبانحال حضرت زینب (س)خطاب سرمقدس امام حسین (ع) شامین یولوندا دختر سلطان مشرقین یوز دوندروب جدا باشنا عرض ایدوب حسین بولمم بو یولدا باشیمه قارداش نلر گلور غم منده یوز گوروب گونی گوندن بتر گلور راز درون سینمی فاش ایلسم حسین آغلار گوزومدن اوز اوزونه اشک تر گلور چوخ اشک توکموشم گوزومون یاشی قورتولوب گوزدن عوض سرشکیمه خون جگر گلور بیر کارواندی کعبه ی دلدن عروج ایدوب آدین قویوبلا گوز یاشی شام و سحر گلور از بس بو یولدا شمر شرارت دالینجادور بو فرقه دن همیشه بیزه شور و شر گلور اهل جفا کمندینه سالدی قضا بیزی اهل وفایه اهل جفادن خطر گلور آهو سوروسی تک دوشن آردونجا چوللره بیر دسته آهوان حرم دور ملر گلور شب تیره ساربان بیله بیرحم یول اوزاق قمچی الینده شمر ستمگر گیدر گلور گاهی ویرار حرم لریوی گاه قیزلارون اولموش بلایه آل پیمبر سِپَر گلور بیراه گوردی یوللاری رحم ایتدی زینبه اولموش باشون جداده بیزه راهبر گلور یولدان چیخوب یتیمه لرون یولدا قالماقون آغلار گوزوم حسین یول اوزون سو سپر گلور کانون قلبیمون اودی دنیانی یاندیروب هر دم خیالیمه او یانان خیمه لر گلور سوندی ستمله شمع شبستان عیشیمیز پروانه لر یانا یانا بی بال و پر گلور سندن حسین گچن گیجه چوخ ناگرانیدیم اُولسون باجون خیاله عجب فکرلر گلور آلدیم خبر حسین سنی شمر لعین دئدی مهماندی خولیه گیجه امّا سحر گلور بولدوم تنور خولیده آسوده یاتموسان قانلی باشون گوتورموش او یئردن اثر گلور گه نیزه گه تنور گهی دیر گه کنشت بو باشه بولمورم نقدر درد سر گلور گه کوفه ده آسالاّ آغاشدان ویرالاّ داش گه خیزران غمی گهی ظلم فنر گلور یول قورخولوقدی ایلمروخ لیک واهمه عباس تک بو دسته ده صاحب هنر گلور کلثوم بو مراحل مِحنتده باغلیوب قانه دونن سرشکیله بار سفر گلور بیر بیر باخور جدالره عباسی آختارور بی اختیار باشینه توپراق سپر گلور بولمم نه یئرده گوردی علمدار باشینی دیوانه تک اوزوندن اولوب بی خبر گلور مجنون اولوبدی لیلی گزر کوهساریده پابند تار عشقدی شوریده سر گلور چون دستگیر طرّه ی اکبردی نیلسون عشقون کشاکشی اونی شامه چکر گلور زلفون سالوبدی عارضه بیچاره نو عروس گزلینجه حُسن قاسمه ایلر نظر گلور عرض ایلر ای عم اوغلی سنون من اسیریوم تاب ایلرم بو یولدا بلا هر قدر گلور من تک عروس سن کیمی داماد نا مراد بو بی وفا جهاندا عم اوغلی مگر گلور شام ایچره جار چکدیلر حکم یزیدیله شهر دمشقه عترت خیر البشر گلور بازاری باغلیون ایلیون پیشواز عام پیغمبرین عیالی اولوب دربدر گلور جور و جفا و ظلمیله اسلام امامینی زنجیره باغلیوبدی بو قوم کفر گلور بیر کاروان بو شهره گلور مایه ی عزا محمل لری قاباخجا دالی نیزه لر گلور ای مدعی عبث یئره چوخ ایتمه ادعا (( خازن )) کیمی جانه مگر نوحه گر گلور ****** مرحوم سیدعبدالحسین خازن تبریزی برچسبها: عبدالحسین خازن تبریزی
+ نوشته شده در جمعه ۲۴ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
