|
خروج اهل بیت از کربلا و حرکت به سوی مدینه حسین شش گوشه قبروندن بو زینب مشکل آیریلسون امام امر ایلوری ، امّا گرک ویرسین دل آیریلسون گیدنده قویمادی دشمن سنه من آغلیوم آزاد بو قبر اوستونده حقّیم وار ئولونجه ایلسم فریاد امامون امری مجری' دور دیور بو سیّد سجاد بو گون قبرِ شریفیندن هامی خویش و اِل آیریلسون دیارِ کوفه و شامی گیدوب سِیر ایلدیم بیر باش اوزون آگاهسن بی حد بلالر چکمیشم قارداش یزیدون بزم شربینده منه چوخ ظلم ایدوبلر فاش جزاده رحمتِ حقدن او قومِ باطل آیریلسون جفای شامیانیله بیزه هر صبح ، شام اولدی منه آسوده لیق دائم او شهر ایچره حرام اولدی قیزون ویرانه ده ئولدی خرابه یئر مقام اولدی دگیلدیم راضی من ، مندن ایله شیرین دیل آیریلسون بو گوندن بیرجه گون اوّل حسینیم من ئولیدیم کاش ایدوم عزمِ وطن ایندی نجه بولمم منه کول باش بو قبرِ مشکباروندان نه نوعی آیریلوم قارداش باجی قارداش مزاریندن که اولماز مایل آیریلسون شکسته کشتی تک سندن کنار اولدوم بو مدّتده دولاندیم ظلم دریاسین برادر کنجِ غربتده یتیشسه ساحله کشتی قالان گردابِ محنتده نئجه راضی اولور بیرده که اوندان ساحل آیریلسون منه بو کربلا دشتی حسین بیر گلشنِ غمدور قبورِ آلِ پیغمبر گلستانِ معظّمدور پریشان بلبلم یوزده دوران گوز یاشی شبنمدور بئله بیر صحنِ گلشندن چتیندور بلبل آیریلسون علیّ اکبرین قبرین چکیب آغوشینه لیلا حسین پائین پایوندا چکر فریاد و واویلا اوغول قبریندن آیریلماز نقدر عمر ایلسه حتّی علاجی یوخدی امر ایلور امامِ عادل آیریلسون تیکوبدی گوز یولا صغری' بولورسن سن نه مدّتدی جمالِ اکبره بیر عمر او بختی قاره حسرتدی اوزی نالان ، گوزی گریان ، انیسی درد و فرقتدی چوخ ایستیر وصلِ اکبرده گینه بیر محفل آیریلسون سوروشسا فاطمه مندن علی قارداشینی قارداش سوسوز جان ویرماقین بولمم اونا ایلوم نجه من فاش یولار زلفین، ایدر ناله ، توکر رخسارینه قان یاش واریمدی واهمه زلفی باشیندان تل تل آیریلسون ایچوب جامِ اجل یکسر جوانانِ بنی هاشیم اولاندا واردِ یثرب آخار رخساره گوز یاشیم دئسم امّ البنینه من ئولوب عبّاس قارداشیم آنادور حقّی وار اوندان او صبرِ کامل آیریلسون بو عالی دودمانوزدا شها بیر سائلم منده ملقّب (( زائرم )) امّا اوزوم چوخ خوار و شرمنده منه معلومدور مولا که واردور چوخ کرم سنده درِ صاحب کرامتدن چتیندور سائل آیریلسون ****** اسد آقا زائر محمدی برچسبها: اسدآقازائرمحمدی تبریزی
+ نوشته شده در شنبه ۲۵ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
