|
عزم میدان حضرت ابوالفضل العباس (ع) گوردی لشکر آلوب عبّاس اله شمشیر گلور روبه اوسته دیه سن حمله ایدوب شیر گلور حامل پرچم دین چیگنینه بیر مشک سالوب بیر وقاریله گلور هر گوره نین صبرین آلوب العطش صوتی گویه خیمه سرادن اوجالوب غیرتیندن قیزاروب گوزلری چون شیر گلور قصد ایدوب نهر فراتی ، آپارا خیمیه سو رهبریندن اونا بیر امردی بو کار نکو گوردی مسدود ایلیوب سو یولونی قوم عدو اویادا لشگری سسلور اوجا تکبیر گلور لشگرین قلبینی گوردی که دوتوبدور ایله زنگ ائتدی احساس اولوبلار هامی آمادۀ جنگ تیر باران ایده جاقلار ایله سه ذرّه درنگ قاریشوب بیر بیره میداندا جوان پیر گلور دوندروب دشمنه یوز سسلدی با صوت جلی قویموسوز تشنه جگر نور حق لم یزلی منم عبّاس ، آتامدور اسد الله علی بو فراتی که آخور ایتماقا تسخیر گلور من مطیعم او شهه لشگرینه سر سپهم آسمان شرف و عزّته تابنده مهم او که مولا بویوروب مجری دستور شهم راضیم باشیمه بو یولدا نه تقدیر گلور یاتمیون بیله ، جهالت یوخوسوندان اویانون کیم دیوبدی بو حسینین قاباقیندا دایانون اودی زهرا بالاسی ، شرم ایلیون بیر اوتانون اونا ساری کیم اگر ایلسه تدبیر گلور ایله ایش گورمیون احوالیزه کفّار گوله عدّه ای خار صفت ال تاپا ایستور بو گله گیتمیون ناره طرف ایستمیون قان توکوله مسلم اولساز سوزوم ایلر سیزه تاثیر گلور فرق ایدر سیز دوتان اسلامیله اسلامِ علی گیچر اوندا گنهوزدن حق علّامِ علی اصل اسلامی دوتوب سیزده دیسه ز نامِ علی اهل جنّات اولاسوز ، ویرماقا تبشیر گلور گنج عصمتده اولان گوهر یکتادی حسین کیمدی هند اوغلی، امیر اولماقا اولادی حسین مفخر ما خلق اللّهیدی ، مولادی حسین سیزی اوددان قوتارا شاه گره گیر گلور سیز گلون حقّی قبول ایلیون ای لشکر کین قویمیون فاطمه اوغلی قالا بی یار و معین اولماساز آگه اولون تابع قرآنیله دین اوندا ارقامه چتین سیزده کی تقدیر گلور بادۀ نخوت و کبر ازبس ایدوبدور سیزی مست عقلوزی الدن آلوب زادۀ مرجانۀ پست بو مسلّمدی دمادم سیزه یتدوقجا شکست غَضَبه ایمدی زیاد اوغلی سیزه میر گلور بو نصایح ابداً قویمادی لشگرده اثر سسلدی شیر خدا اوغلی که ای قوم کفر قدرتیم واردی ایدم یر یوزونی زیر و زبر چون اولوب آب و گلیم جنگیله تخمیر گلور ائتمز احساس خطر آل علی من که وارام خم یتیشمز قاشیما گر اولا مینلرجه یارام وئرمیشم وعده گرک خیمه لره سو آپارام خوشدی گورسم که یارامدان دم تحمیر گلور بیر نفر سسلدی گئت لشگریوی یغ باشیوا باتمامیش قاشدان آخان قان یوزیوه گوزقاشیوا آلِ هنده دئنه بیعت ایلسین قارداشیوا ائتمسه بیعت اگر قتلی دئمه دیر گلور تا ائشیتدی بو سوزی سسلدی عبّاس دلیر اولمیا فرض ایلیسوز سیز بو ابوالفضلی حقیر هله جنگ ایتمه میشم لرزه دوتوب قلبوز اسیر سیزی بو ضیغم غاب ایتماقا نخجیر گلور آلدی شمشیرین اله یوز قویوب اشراره طرف گلدی هر کیم قاباقا اولدی او شمشیره هدف دیدیلر بیر بیره عبّاسدی یا شاه نجف؟ جنگی بر نفع حسین ویرماقا تغییر گلور خامه عاجزدی نئجه جنگ ایلیوب شرح ویره چوخلارین دوتدی آلوبدور باشینا ووردی یره دیدی ای کاش گلوب جنگیمی زهراده گوره بویورا شیر قیروب بیشه ده زنجیر گلور بویوروب هاردادی سعد اوغلی دیون جنگه گله اونا بیر ضربه وورام گوگلره قانی سپیله ایستورم درک ایلیه صولت عبّاسی بوله یالوارار آتدان اگر گورسه سرازیر گلور بو ابوالفضلیدی جنگ ایلسه یوز همتاسی صاحب رتبه دی بو کرب و بلا سقّاسی توکدی قانلار یره موج ایلدی قان دریاسی ال گوتورمور ایدوری دشمنی تحقیر گلور قولدا تا قدرتی وار یاره او اوباشه وورور بعضی نامردی گورور ال آتوری داشه وورور قولّاریندان یاپیشور دشمنی باش باشه وورور بعضی جانین قوتارا ایلوری تزویر گلور کیمدی عبّاس ، او هنگامه نی بیر آل نظره پوزدی پرگارین او دورت مین نفرین تک نفره ایلدی نقش زمین سالدی الین هر کمره آری عبّاسدی گوردوز سوزه تعبیر گلور باشدی الدی توکولردی یره اول لشکردن فنّ جنگی نه چون آلمیشدی ازل حیدردن گلوری عرصیه تحسین سسی گویلردن فضل عبّاسی قلم ایلوری تقریر گلور خشم عبّاسی گوروب ایلدی بیر دسته فرار گوردولر کیم دایانا آت ایاقی آتدا قالار تنگ اولوب لشکر کفّاره او وسعتلی قفار هر یره گوز ساتاشور گوردوله شمشیر گلور صفلری پوزدی ، آلوب نهری، یره ووردی علم دولدوروب اوجونی آبیله او سقّای حرم ایستدی میل ایلسین یاده دوشوب شاه امم سپدی آبی یره جانیندن اولوب سیر گلور چیگنینه سالدی سو مشکین، دوشوب آهسته یولا نخلزاره یولونی سالدی مسافت آز اولا او سویون قیمتی باخدی اونا بیر جفت قولا بولمدی آردیجا بیر عدّۀ تکفیر گلور سالدیلار قوللارینی ، مشکی حراست ایلدی پرچمی آلدی تیز آغوشه مهارت ایلدی بیر ستمگر او زمان آیری جنایت ایلدی تا باخوب مشکه طرف گوردی که بیر تیر گلور اوخ دگوب مشکه، گیدوب باده هامی سعی و تلاش من دیمم نوفل عمودیله شکست اولدی او باش یوز دوتوب سمت خیامه دئدی تیز گل قارداش بولدی شه آیۀ صبرین ایده تعمیر گلور آتینا زینب کبری گتیروب ائتدی سوار بولمورم گلدی نه حالیله او دریای وقار کیم اوزاقدان نظر ایتسیدی بولردی که نه وار یاغوری اوستونه اوخلار ، دئمه بیر تیر گلور تنگ اولوبدور او شهین عالم امکان گوزینه اشقیا گوردی ووروب ظلمیله پیکان گوزونه گوزلرین آچموری ازبسکه دولوب قان گوزونه سمعینه گوردی یواش نالۀ شبگیر گلور جان وئرن وقتیده عبّاس وجودینده یارا بو امیدیله حسین قارداشینی ائتدی صدا چون بولوردی دم آخِرده او سلطان ولا کلمۀ عشق و وفانی ایده تفسیر گلور ای (( امینی )) بو سوزی نظم ایلدون طوفانی هر سوزون واردی همی اوّلی هم پایانی بسدی گل ایلمه آزرده دلِ زهرانی باخما ایلور قلم اشعاریوی تحریر گلور مسلم و کافر ئولن وقته گلر شیر خدا اودی میزان عمل ، ردّ ایلمه ایتمه خطا اونا فرق ایلمز اصلا شه اولا یا که گدا اوزی زنده گله جاقدی دیمه تصویر گلور اودی مولای جهان شیعه لرین داد رسی یوزونی گورماقا وار اهل ولانین هوسی اعتمادیم بونا وار قبریمین اوّل گجه سی منی تک قویماز ، اگر ائتسه ده تأخیر گلور صَیرَفی هر کیم اگر اولسا او عبّاسی تانور باغبان رسمیدی گلشنده گل یاسی تانور شیعه لر سهلدی عالم هامی عبّاسی تانور کیم آدین سسلر ایدر عشقینی توفیر گلور ****** حاج مجید امینی
برچسبها: مجید امینی تبریزی
+ نوشته شده در یکشنبه ۲۶ اسفند ۱۴۰۳ساعت توسط حاج محمد محمد قاسمی
|
|
درباره وبلاگ  بسم الله الرحمن الرحیم
«مَن بَکی أَو أَبکی أَو تَباکی فی مُصیبهِ الحُسین حُرِّمَت جَسَدَهُ علی النار و وَجَبَت لَهُ الجَنَّه .» ؛هرکس در مصیبت امام حسین بگرید یا بگریاند و یا ( اگر گریه اش نیامد ) خود را به حالت گریه بزند ؛ جسدش بر آتش حرام شده و بهشت بر او واجب می گردد التماس دعا حاج محمد محمد قاسمی
|
