‍ کوچ از قتلگاه

(سبک : ای باد صبا کرب و بلایه گذر ایله)

گوردی اُسرا چون شهدایه کفن اولماز

عرض ایتدیله یا رب بله درد و مِحن اولماز

یوز قتلگهه قویدولا با ناله و فریاد

مین شوریله هر بلبل ایده اوز گولونی یاد

گوردیله دوشوب سرو یخلمیش یره شمشاد

صولموش گل و سنبل بله صحن چمن اولماز

لیلی ایلیوب نعش علی اکبری بیر دور

چون یاره لرین گوردی ایدوب زخم دلی غَور

سویلوب ای اوغول هرکیم ایدوب جسموی بوطَور

بولمم او جفا کارین الی شل ندن اولماز

قاندان چکولوب صفحّه رخساریوه جدول

ذبح آیه سی تفسیر اولونوب اوندا مفصّل

سِرّ وَ فَدَیناهُ اولوب سنده مکمّل

اسماعیل اوغول عشق مناسینده سن اولماز

میدانی سریه دولانوب با دل رنجور

تاپدی بدن قاسمی گلدی اله منظور

عرض ایتدی گرک ناله ایدیدیم سنه مستور

هر چند خیال ایلرم ای ماه ِ من اولماز

اسرار دیلون نی ده قالان نالیه بنزر

دورِ مَهِ رویوندا خطون هالیه بنزر

رخسار خطون سبزیه هم لالیه بنزر

ای وجه حسن بیله که وجه حسن اولماز

کلثوم تاپوب باشسیز علمداری توکوب یاش

گوردی که همی قول کسیلوب ظلمیله هم باش

عرض ایلدی نه کول سووروم باشیمه قارداش

باشسیز بدن آخر اولی قولسوز بدن اولماز

ای ماه بنی هاشم اولوم عهدیوه قربان

نه عهدیله بو قوم گتوردی سنی مهمان

پیمانّ غم ویردیله سندیردیلا پیمان

بو قوم تک هیچ طایفه پیمان شکن اولماز

حیران دولانوردی او بلا دشتنی زینب

گویا که او مظلومیه مستوریدی مطلب

عرض ایلدی هر چند گزیرم بو چولی یارب

قارداشیم حسینی منه بیر گوسترن اولماز

زینبده ظهور ایتدی محبّت لمعاتی

چکدی اونی بیر گوشیه عشقین جذباتی

بیر نعشه یتوب بسکه واریدی جرحاتی

گوردی عدد زخمینی هرگز بولن اولماز

چون تیره گوروب زینب او دم کوکب بختین

قارداشینه ظاهر ایلدی نالۀ سختین

عرض ایتدی سویالّار شهدانین بلی رختین

قارداش نه که اگنینده ده بیر پیرهن اولماز

ای عشق بساطینده سلیمانیدن اعلا

بلقیس جمال عترتیوه ایله تماشا

کسمیش بیر اوزوکدن اوتور انگشتوی اعدا

هرگز بو شقاوتده حسین اهرمن اولماز

هر کیمسه اولا رونق بزم غمه مایل

یا رب سن اوزون لطفوی ایله اونا شامل

حضّاریله بو (( راجنون )) ائت اجرینی کامل

تأئید حسین دور بیله طرز سخن اولماز

******

مرحوم ابوالحسن راجی تبریزی


برچسب‌ها: ابوالحسن راجی تبریزی
+ نوشته شده در  یکشنبه ۲۶ اسفند ۱۴۰۳ساعت   توسط حاج محمد محمد قاسمی  |